Banorët e lagjes “5 Maji” në kryeqytet kanë protestuar këtë të hënë, pasi kundërshtojnë vendimin e qeverisë për t’iu prishur shtëpitë. Ashtu siç ishte lajmëruar, edhe ditën e sotme vazhdon aksioni i prishjeve të banesave dhe forca të shumta të Inspektoriatit Kombëtar për Mbrojtjen e Territorit (IKMT) janë të pranishëm për të zbatuar urdhrin.
Në një prononcim për mediat, banorët shprehen se refuzojnë shembjen e shtëpive, ndërsa i bëjnë thirrje deputetëve demokratë të bojkotojnë parlamentin e t’iu bashkohen në protesta.
“Edi Rama duhet të mendojë për popullin. Unë dua shtëpi, pse më nxjerrin. Ne presim vetëm të na futet Serbia të na futet në shtëpi. Ky është skandal i madh. Ta marrë vesh e gjithë bota. Kanë për t’u prishur 1500 shtëpi. Si prishen këto? Sot e kam datën unë, s’dal nga dera, do vdes aty brenda. Turku dhe Serbia bën kështu, asnjë tjetër. Bojkotoni foltoren e parlamentit dhe ne do të jemi të gjithë aty. Ne kemi dalë për një qëllim kemi dalë. Deputetët demokratë ta bllokojnë foltoren dhe të gjithëve na kanë te parlamenti. Të gjithë do të jemi atje. Po s’u bllokua parlamenti, do të bëhet gjak, s’ka rrugë tjetër”, tha njëri nga banorët,
Protestës iu është bashkuar deputeti demokrat Agron Gjekmarkaj, ndërsa më herët ka qenë nënkryetari i PD, Alfred Rushaj që ka mbështetur banorët në kauzën e tyre.
