Kryetari i Kontrollit të Lartë të Shtetit Arben Shehu, ka urdhëruar nisjen e auditimeve për të gjithë procesin e parashtruar në kërkesën e dërguar nga artistët e Cirkut Kombëtar.
Ditën e premte pranë KLSH-së është paraqitur një kërkesë me shkrim nga artistë të Cirkut Kombëtar Shqiptar, ku kërkohej një hetim më i gjerë mbi veprimet apo mosveprimet e kryera nga Cirku Kombëtar.
Përmes shkresës referohen disa shkelje nga ana e punonjësve të institucioneve të sipërcituara, në kundërshtim me procedurën administrative të caktuar për mbrojtjen e interesave të tyre ligjore në kuadër të një procesi gjyqësor.
Gjithashtu, artistët kërkojnë një hetim më të thellë mbi mënyrën e menaxhimit të veprimtarisë së Cirkut Kombëtar nga ana e titullarit të këtij institucioni. Në këtë kuadër KLSH vendosi të nisin hetimet. Disa ditë më parë, përmbarimi ka shkuar për të ekzekutuar vendimin për sekuestrimin e tokës ku është ngritur çadra e Cirkut Kombëtar, por artistët e kanë kundërshtuar këtë vendim, pasi sipas tyre nëse iu merret kjo pjesë (rreth 400 metra katrorë) gjithë vendi tjetër është jofunksional.
Ministrja Margariti: Vazhdojmë betejën në Gjykatë, s’kemi ndalur
Ministrja e Kulturës, Elva Margariti ka folur në lidhje me çështjen e Cirkut Kombëtar. Në një deklaratë për media, Margariti, e shoqëruar nga nënkryetari i Bashkisë së Tiranës, Arbjan Mazniku, u shpreh se janë në pritje të gjykimit dhe vendimit që do të marrë Gjykata.
“Nuk varet prej nesh, por ne në asnjë moment nuk e kemi ndalur betejën tonë. Gjatë pandemisë ka pasur disa aspket të komunikimit që po vazhdojnë që një pjesë nuk kanë kaluar në ministrinë e Kulturës. Ne e kemi vazhduar procesin gjyqësor dhe jemi në pritje. Dhe kemi takime zhvilluar takime me avokaturën. Përtej kësaj bashkë me bashkinë kemi punuar për tu integruar në hapësirë që e shikojmë më të volitshme. Monetalisht cirku nuk do ketë çadër do performojnë në palestër,”- tha Margariti ndër të tjera.
Aktorët e Cirkut Kombëtar kërkuan që toka ku ndodhet çadra të shpronësohet, që arena t’i shpëtoj prishjes ose të përgatitet një ambient i ri cirku.
