Sindikata e Artistëve ka reaguar ditën e sotme pas prishjes së Cirkut Kombëtar nga bashkia. Përmes një interviste televizive Kryetari i Sindikatës së Artistëve, Jul Kazazi deklaroi se kanë shkuar pranë Ministrisë së Kulturës në pritje të një përgjigje se ku do e ushtrojnë aktivitetin e tyre artistik.
Sipas tij, ata kanë kërkuar prej 3 muajsh një plan shtesë, por qeveria as nuk ka marrë për bazë kërkesën e tyre dhe as nuk është konsultuar me ta për marrjen ke këtij veprimi.
“Shkuam pranë Ministrisë së Kulturës për të marrë një përgjigje se ku do e ushtrojmë aktivitetin tonë artistik. Nuk kemi marrë asnjë përgjigje deri tani. Jemi në pritje të nja plani B, por nuk kemi asgjë deri tani. Ne kemi tre muaj që e kërkojmë këtë plan B, prej 3 muajsh Ministria e Kulturës se ka vënë ujin në zjarr. Shpresojmë të marrim një zgjidhje nga kjo ministri”, tha ai.
Ndër të tjera ai tregoi se, nesër në orën 10 do dorëzojnë pranë Këshillit të Lartë të Shtetit gjithë dosjen e kësaj çështje, që ata e konsiderojnë si aferën korruptive të radhës nga qeveria.
