Stadiumi i klubit të Kukësit ‘Zeqir Ymeri’ pritej që të kishte përfunduar dhe të ishe inauguruar më 15 tetor ose të paktën kështu pati thënë pak javë më parë Presidenti i nderit i klubit, Safet Gjici.
Megjithatë sot, disa ditë pas kësaj date ‘Verilindorët’ kanë njoftuar se ndeshja e radhës si pritës, ajo me Vllazninë që do të luhet më 24 tetor në kuadër të javës së gjashtë të Superligës do të zhvillohet në stadiumin ‘Elbasan Arena’.
Ky lajm është bërë publik nga vetë klubi i Kukësit në një postim në rrjetet sociale, ku thekson edhe se në pesë javë janë grumbulluar gjithsej tetë pikë.
“Skuadra jonë do të luajë javën e ardhshme në ‘Elbasan Arena’ ndeshjen e javës së gjashtë ndaj Vllaznisë. Aktualisht, ekipi ynë ndodhet në kuotën e 8 pikëve pas 5 javësh kampionat.”-njoftojnë ‘Verilindorët’.
Teksa ende nuk është dhënë një datë tjetër se kur do të jetë gati stadiumi tifozët e Kukësit kanë më shumë se dy vite që e presin./K.T/Gijotina.com
