Teksa kushtet e motit priten që të përkeqësohen në 24-orët e ardhshme, duke nisur nga ora 10:30 e datës 21 gusht, është ndaluar pajisja me leje-nisje e mjeteve të vogla lundruese dhe anijeve të peshkimit, si brenda gjirit të Vlorës e Himarës, ashtu edhe në det të hapur.
Të gjithë drejtuesit e mjeteve detare janë të këshilluar të marrin masa sigurie për mjetet dhe ekuipazhet, si dhe të qëndrojnë në gatishmëri për shkak të motit të keq.
Autoritetet bëjnë apel për bashkëpunim nga subjektet dhe institucionet që ushtrojnë veprimtari në fushën e detarisë, me qëllim parandalimin e çdo situate të papritur.
“Në bazë të parashikimit për situatën hidrometeorologjike të përkeqësuar brenda dhe jashtë gjirit të Vlorës, gjatë datave 21-22.08.2025 duke filluar nga ora 10:00 datë 21.08.2025 në drejtimin jug-jug-perëndim në forcën deri 6-7bft me shpejtësi ere deri 15-20m/s dhe lartësi dallge nga 1.50 deri 2.50 metra, ju bëjmë me dije se është ndaluar pajisja me leje-nisje e mjeteve të vogla lundruese dhe ato të peshkimit të cilat operojnë brenda gjirit të Vlorës, Himarës dhe në det të hapur duke filluar nga ora 10:30 datë 21.08.2025”, thuhet në njoftim.
Ndërkohë, anijet e transportit ndërkombëtar do të vazhdojnë të operojnë normalisht sipas destinacioneve të tyre.
Përmirësimi i kushteve atmosferike për mjetet e vogla lundruese dhe peshkarexhat pritet pas orës 08:00 të datës 22 gusht 2025.
Discussion about this post