Kreu i Departamentit të Antiterrorit, Gledis Nano është emëruar ditën e djeshme në krye të policisë së Shtetit, pas dorëheqjes së Ardi Veliut, por publiku ka pritshmëri të larta dhe janë dyshues duke e ditur që ai ka dhe një të kaluar të errët.
Shoqata e Punonjësve të Policisë në Lirim ka shkruar disa ndryshime konkrete që Gledis Nano duhet të kryej.
Njëra prej tyre, është edhe ndryshimi i kupolës drejtuese të PSH, e cila sipas tyre është e inkriminuar dhe e politizuar, për të identifikuar dhe emëruar në ato poste punonjës policie me karrierë.
Por gjithashtu disa ndryshime të tjera, që priten prej tij janë edhe mënyra e punës, duke çuar drejtësinë përpara dhe vendosja e Organizatës së Policisë në “shinat e ligjit”.
Ndryshimet konkrete:
▪️Identifikuar saktësisht problemet që ka patur në vijimësi organizata, duke analizuar arsyet përse ato kanë ndodhur, duke identifikuar personat përgjegjës për këtë situatë, duke hartuar një plan konkret ku të përcaktohen kostot dhe burimet njerëzore që do e zbatojnë atë me qëllim daljen nga kriza që po kalon organizata.
▪️Të ndryshosh kupolën drejtuese të PSH e cila është totalisht e inkriminuar dhe e politizuar, duke identifikuar dhe emëruar në ato poste punonjës policie karriere, me integritet dhe profesionalisht të realizuar.
▪️Të çosh para drejtësisë të gjithë ata drejtues policie që janë të lidhur me bandat, krimin e organizuar, dhe me pazaret e parcelave të cannabisit dhe trafikimin e drogës.
▪️Të vendosësh para drejtësisë grupet dhe organizatat kriminale apo individë me aktivitet të tillë që jo vetëm janë në liri të plotë por edhe mbretërojnë në punët e tyre të pista.
▪️Të vendosësh Organizatën e Policisë në shinat e ligjit, profesionalizmit dhe në shërbim të komunitetit.
▪️Të rishikosh të gjitha rikthimet në detyrë në shkelje flagrante me ligjin të oficerëve larguar nga detyra me shkelje të cilat iu janë amnistuar. Si dhe të gjitha largimet e oficerëve të liruar po në shkelje me ligjin, pa asnjë motiv. Shumë drejtues janë liruar dhe lënë të pambrojtur, të cilat kanë sjell dhe pasoja tragjike si rastet e drejtuesit të lartë të policisë Artan Cuku apo Ervin Dalipi etj.
Theksojmë se për Nanon kanë dalë edhe disa detaje nga jeta e tij e cila nuk është në përputhje me ligjin. Sipas një vendimi të Komisionit të Jashtëm të Vlerësimit janë zbardhur disa momente të errëta nga e kaluara e tij, ku ka shitur një makinë tip “Benz Mercedes” Classe B 200 luksoze me trefishin e çmimit të blerjes në 2016. Ai gjithashtu ndërroi edhe mbiemrin e tij për të fshehur lidhjet me të inkriminuarit.
