Tre punonjës të kompanisë tekstile Alba Converting në qytetin e Fierit që kanë punuar prej muajit qershor në këtë kompani tregojnë për emisionin “Stop” në Tv Klan se nuk kanë marrë pagesat e muajve gusht-tetor.
Përveç kësaj ata janë shkëputur nga puna tashmë me arsyen se kompania ka probleme. Punonjësit thonë se kanë firmosur një kontratë, por ajo nuk është zbatuar.
Menaxheri i firmës është një shtetas italian. Punëtorët thonë se menaxheri u premton se do të paguhen së shpejti. Pozicionet e tyre të punës kanë qenë të ndryshme, zonjat tek pjesa e fasonerisë, ku prodhoheshin materialet për spitale dhe djali tek pjesa e makinerive.
Njëri prej punëtorëve u drejtua tek Alba Converting që të bisedonte me ekonomistin dhe menaxherin por i thanë sërish se duhet të priste.
Punëtori: Për ato lekët doja të të pyesja! Kur do t’i marrim?
Menaxheri: Besi, unë jam vërtet…, mora masë për borxhin, që kam tek ju. Akoma nuk më kanë ardhur. Këtë javë, besoj nga java tjetër, do ta zgjidhim. Më prit edhe pak, se do ta zgjidhim, të lutem!
Punëtori: Po 4 muaj që kam unë aty që punoja këtë më ke thënë gjithmonë. Unë dua një përgjigje konkrete ta di dhe unë se jam futur në borxhe.
Menaxheri: Besi, më beso! Ashtu të tregova, duro, se do ta bëj likuidimin! Edhe sot shiko, më është prishur. (makineria)
Gazetarja e “Stop” takoi me pronarin italian i cili tha se problemet i kanë ardhur nga rënia e euros. Por ai thotë, se do t’i likuidojë punëtorët sapo të mundet.
Menaxheri: Jemi një firmë, që punojmë me eksport. Ne ishim në Vlorë, kemi një vit që kemi ardhur në Fier. Në momentin që ra shumë euro, kishim për të rritur çmimin. Në momentin, që vendosëm çmim të ri, klientët nuk e pranuan sepse ne e rritëm çmimin, ndërsa Kina i uli. Unë kam magazinën plot me materiale. Me shumë punëtorë kemi bërë marrëveshje që në dhjetor që do bëj të gjithë likuidimin që kanë për të marrë.
Gazetarja: Nga punëtorët mua më është thënë, që nga ju u është komunikuar që jo këtë javë, por javës tjetër, do të merrni pagesat dhe asnjëherë nuk i kanë marrë.
Menaxheri: Nuk është se nuk ua di hallin. Unë hallin ua di. Ne jemi brenda një vendi. Ua di hallin.
Gazetarja: Sa punëtorë keni pa paguar?
Menaxheri: Kam listën, ta tregoj, të dokumentuar.
Gazetarja: Përafërsisht!
Menaxheri: Janë 9 ose 10 punëtorë, që nuk është se janë pa paguar, do marrin një pjesë të pagesës. Unë iu bëra një parapagim. Kur erdhi një pagesë në firmë, unë i ndava. Firma sa më shpejt do t’i likuidojë të gjithë, jo një po e një jo.
“Stop” iu drejtua Inspektoriatit të punës, Drejtoria Rajonale Fier. Kjo zyrë ka bërë inspektime të vazhdueshme dhe e ka gjobitur firmën me 4 milionë lekë të vjetra për mospagesën ndaj punëtorëve./tvklan.al
Discussion about this post