Partizani pësoi të dielën një humbje të dhimbshme ndaj Egnatias me shifrat 3-0 në Rrogozhinë dhe mori një goditje të fortë në rrugën për titullin kampion.
Përveç humbjes, në faturë shtohet edhe mungesa e Valentino Muratajt, i cili mori kartonin e tij të katërt të verdhë në këtë sezon dhe do t’i duhet ta ndjekë nga tribuna betejën e së enjtes ndaj Laçit. Mesfushori është një nga të preferuarit e Kolelës.
DËMTIMET – Viktor da Silva mbeti i dëmtuar në ndeshjen e së dielës. Braziliani luajti vetëm çerek ore, derisa pati atë përplasje aq të diskutuar me portierin Alen Sherri dhe mbeti i dëmtuar, duke i lënë vendin Carës.
Burime për gazetën bëjnë me dije se sulmuesi nuk ka ndonjë problem serioz, por për të parë më qartë shkallën e dëmtimit, sot do t’i nënshtrohet një ekografie.
Edhe Matondos iu desh të linte fushën e lojës pas një përplasjeje në mesfushë, që e detyroi të dilte pa u mbyllur pjesa e parë. Kongolezi nuk ka diçka serioze, por koha nuk i premton as atij dhe as Da Silvës.
Ndeshja me Laçin në transfertë është vetëm pas dy ditësh dhe koha është totalisht kundër dy lojtarëve. Ata nuk janë stërvitur dje dhe nuk pritet ta bëjnë as sot. Gjithsesi, do të duhet të pritet deri në fund.
FORMACIONI – Mesfusha e Partizanit duket se do të duhet të ndryshojë e gjitha ndaj Laçit. Telushi pritet titullar, teksa mbetet për t’u parë nëse do të luajë Romero apo Kolela do t’i besojë ndonjë talenti të ri si Arapi apo edhe Hodo.
Discussion about this post