Pavarësisht se Rektorati i Universitetit “Aleksandër Xhuvani” i Elbasanit ka marrë të gjitha masat për mbarëvajtjen e procesit të vaksinimit të studentëve dhe personelit akademik, ky proces po vijon me ritme mjaft të ngadalta.
Në bashkëpunim me Drejtorinë e Kujdesit Shëndetësor është organizuar puna për mbarëvajtjen e këtij procesi duke u ngritur dy qendra vaksinimi kundër COVID-19, një qendër vaksinimi pranë Korpusit Kryesor ku ka nisur vaksinimi për rreth 4000 studentë të fakulteteve të Shkencave Humane, Shkencave Sociale, Shkencave të Natyrës dhe Fakultetit Ekonomik.
Konfirmohet se në ditën e parë të javës pranë dy qendrave të vaksinimit ishin paraqitur vetëm 6 studentë, ndërsa në ditën e dytë vetëm 12, kurse sot nuk ka ardhur asnjë student.
Studentët shprehen se ata dëshirojnë të vaksinohen, por imponimin e kanë të vështirë ta pranojnë. Por të tjerë bëjnë thirrje bashkëmoshatarëve që të vaksinohen sepse kjo i shërben shëndetit të tyre dhe ecurisë së procesit mësimor.
“Nuk e kam bërë vaksinën sepse kam kaluar COVID-in dhe nuk mund ta bëj për 6 muaj. E di që vaksina është me detyrim në universitet, por përsa kohë më ka thënë mjeku që nuk duhet, besoj se nuk do ta bëj”
“Jam vaksinuar. Ishte dëshira ime. Madje që nga fillimi kam dashur që ta bëj. Unë jam pro vaksinimit të detyruar sepse ajo është një vaksinë që duhet bërë si të gjithë vaksinat e tjera. Nuk është diçka për t’u patur frikë. Unë i kam bërë të dyja vaksinat dhe nuk i kam shumë problem spekulimet që jepen nëpër mediet e ndryshme” –thonë studentët.
Gjithashtu i njëjtë është edhe problemi për marrjen e vaksinës në Korçë, ku interesi është shumë i ulët, pasi studentët janë skeptikë.
Rreth 10 studentë kanë kryer vaksinën përgjatë 2 ditëve. Ata që e kanë përqafur më së shumti janë studentët e vitit të parë pasi ndihen të frikësuar edhe janë zhvendosur në Korçë në banesa me qira apo konvikte.
Deri në këtë moment, në 2 qendrat e vaksinimit nuk ka pasur asnjë student të paraqitur, ndërsa ende nuk dihet si do procedohet me këta studentë.
