Profesori Lush Susaj ka folur nga protesta e 113-të para Kryeministrisë, duke bërë thirrje për vijimin e qëndresës dhe përsëritur kërkesën për dorëheqjen e kryeministrit Edi Rama.
Susaj tha për News24 se 113 ditët e protestës duhet të shërbejnë si frymëzim për të vijuar drejt qëllimit, që është largimi i qeverisë dhe hapja e rrugës për pluralizmin politik dhe demokracinë.
Profesori theksoi se qëllimi është që Shqipëria të çlirohet nga “mafia e korrupsionit”, e cila ka ndikuar në jetën politike, ekonomike dhe shoqërore të vendit.
Lush Susaj: Janë 113 ditë frymëzim për të vazhduar, për të vazhduar në qëllimin e përbashkët që është dorëheqja pa kushte e kryeministrit dhe autokracisë që ka mbledhur rreth tij, dhe që është hapja rrugë e pluralizmit politik dhe demokracisë.
Çlirimi i Shqipërisë nga një mafie e korrupsionit, e cila e ka zanafillën qysh në vitin 1992 dhe ka zënë të gjitha hapësirat shoqërore, politike, ekonomike të Shqipërisë dhe që po ia merr frymën Shqipërisë, mjedisit, po dëbon elitën, po dëbon ekspertizën, gjithë qytetarinë dhe rininë. Po i boshatis shkollat e universitetet.
Për këtë jam në protestë, kam dalë që në ditën e parë. I bëj thirrje shqiptarëve të dalin në shesh me qëllimin e largimit të qeverisë që e ka qelbur në të gjitha drejtimet.
Çfarë duan më shumë shqiptarët që të dalin? Kjo qeveri ka shkatërruar sistemin e shëndetësisë, arsimor, bujqësinë, pronat, sigurinë juridike.
Mos e rrokullisni Shqipërinë në konflikt social. Në ’97 u vranë djemtë tanë, jo politikanët. Nëse vjen ajo ditë, do të vijë prej indiferentizmit tuaj dhe ju që rrini në kafene nën avujt e alkoolit.
Discussion about this post