Nënkryetarja e Partisë Demokratike Jorida Tabaku, ka folur për progres-raportin e Komisionit Europian. Ajo u shpreh se është një nga raportet më të forta të viteve të fundit dhe njeh realisht problemet e Shqipërisë. Tabaku gjithashtu tha se duhet lëvizur nga retorika politike dhe të kalohet tek veprimet. Sipas saj Shqipëria është në një ngërç sa i përket integrimit.
“Raporti njeh problemet dhe është një nga raportet më të forta të viteve të fundit. Për hapjen e negociatave mban të njëjtin qëndrim. Kemi një rritje të përqendruar mbi procesin e integrimit dhe nuk ka asgjë të re. Shqipërisë duhet t’i hapen negociatat por ne duhet të jemi të sinqertë dhe të themi se situata jonë është ndryshe nga vendet e tjera pasi kemi probleme me zgjedhjet, korrupsionin, me mediat. Besoj se i jep një pamje reale të asaj që sot qytetarët po përjetojnë. Është një këndvështrim gjeostrategjik se pse Shqipëria duhet të fillojë negociatat. Raporti thotë se Integrimi është shumë i ulët në agjendën e qeverisë. Ne duhet të lëvizim nga retorika politike dhe të kalojmë tek veprat. Unë i kam kërkuar sot qeverisë që të lëvizim me plane konkrete. Ne do të vlerësohemi për punën që bëjmë. Kemi po të njëjtën nivel vlerësimi si në 2015-ën. Duhet ta kalojmë këtë ngërç. Ky është një vendim politik për të mos cenuar demokracinë. Kemi 5 vite që festojmë hapjen e negociatave dhe në fund të ditës rezultati është ky”- tha ajo.
Ndërsa për amendamentet e propozuara nga PD, Tabaku tha se i hapin rruge debatit. Sipas saj pa një reformë Territoriale dhe Zgjedhore nuk mund të vazhdohet më tej. Ajo tha se PD i qëndron akoma listave të hapura 100% duke akuzuar kryeministrin Rama se ndryshoi Kushtetutën dhe rregullat e lojës në favor.
