Qeveria ka hedhur për diskutim një projektligj që do të ‘tolerojë’ punonjësit në fushën e IT-së për sa u përket pagesës së kontributeve e sigurimeve shoqërore. Në projektligj bëhet me dije e pavarësisht pagës bruto që punonjësit e kësaj fushe do të kenë, detyrimet që do të paguajnë do të jenë standarte, aq sa u takon të derdhin bazuar në pagën minimale prej 40 mijë lekësh. Gjithashtu, në të njëjtin projektligj bëhet me dije se pensionistët e vetëpunësuar në sektorin privat, nuk do të paguajnë kontributet e sigurimeve shoqërore.
Pjesë nga projektligji për punonjësit e IT-së:
Pas datës 01.04.2023 paga maksimale për efekt kontributi rritet me të njëjtën masë dhe në të njëjtën kohë me masën që rritet paga minimale në shkallë vendi. Personat e punësuar me profesion në fushën e teknologjisë së informacionit (IT), dhe të regjistruar në subjektet me aktivitet kryesor në fushën e teknologjisë së informacionit të cilët ushtrojnë aktivitetin e tyre sipas Ligjit Nr. 58/2022 “Për krijimin, organizimin dhe funksionimin e Parqeve Teknologjike dhe Shkencore”, të miratuara sipas legjislacionit në fuqi, për këtë kategori paguajnë kontributet e sigurimeve shoqërore në nivelin e pagës minimale mujore në shkallë vendi, me miratimin paraprak të punëmarrësit, të evidentuar në kontratën e punës, pavarësisht pagës bruto të deklaruar. Neni 15/1 “Përjashtohen nga detyrimi për të paguar kontributet e detyrueshme të sigurimeve shoqërore, përfituesit e pensionit të pleqërisë që vetëpunësohen si të vetëm në sektorin privat.
Pjesë nga projektligji për pensionistët:
Përjashtohen nga detyrimi për të paguar kontributet e detyrueshme të sigurimeve shoqërore, përfituesit e pensionit të pleqërisë që vetëpunësohen si të vetëm në sektorin privat. Ky ligj hyn 15 ditë pas botimit në Fletoren Zyrtare dhe shtrin efektet nga kjo ditë.
Discussion about this post