Prokurori i Përgjithshëm i Trump: Të eleminohen kartelet dhe krimi i organizuar në Shqipëri -

Ambasada e Shteteve të Bashkuara në Tiranë ka njoftuar përmes një postimi në rrjetet sociale vizitën zyrtare të Ndihmës Drejtorit të ICITAP të Departamentit Amerikan të Drejtësisë, Stephen Fields, i cili qëndroi në Shqipëri nga 19 deri më 23 maj.

Sipas Ambasadës, gjatë vizitës së tij, z. Fields u takua me të Ngarkuarën me Punë Nancy VanHorn, si dhe me zyrtarë të tjerë të ambasadës dhe drejtues të institucioneve të zbatimit të ligjit në vend, për të theksuar partneritetin e fortë mes SHBA dhe Shqipërisë. Ai përcolli prioritetet e Prokurorit të Përgjithshëm të SHBA në luftën kundër karteleve, krimit të organizuar ndërkombëtar dhe emigracionit të paligjshëm.

Ambasada bën të ditur se gjatë qëndrimit në Tiranë, z. Fields zhvilloi takime me Ministrin e Brendshëm Ervin Hoxha, kreun e SPAK Altin Dumani, Drejtorin e Policisë së Shtetit Ilir Proda, Drejtorin e Agjencisë së Mbikëqyrjes Policore Florian Sulejmani, Drejtorin e Përgjithshëm të Burgjeve Klevis Qose dhe zyrtarë të tjerë.

Gjithashtu, përmes ICITAP dhe bashkëpunimit me Byronë kundër Terrorizmit dhe INL të Departamentit të Shtetit, janë dorëzuar pajisje amerikane në vlerë prej 340,000 dollarësh për burgjet shqiptare. Në përmbyllje të vizitës, u zhvillua ceremonia e ndarjes së Çmimit të Ekselencës dhe akreditimi i parë ndërkombëtar IADLEST për Akademinë e Sigurisë.

Postimi i plotë i Ambasadës:

Ambasada e SHBA-së në Tiranë mirëpriti Ndihmës Drejtorin e ICITAP të Departamentit të Drejtësisë të ShBA, Stephen Fields, nga 19 deri më 23 maj. Gjatë vizitës së tij, Z. Fields u takua me të Ngarkuarën me Punë Nancy VanHorn, zyrtarë të Ambasadës dhe udhëheqës të institucioneve të zbatimit të ligjit në Shqipëri për të shprehur mirënjohjen për partneritetin e fortë me Shqipërinë.

Fields përcolli prioritetet e Prokurorit të Përgjithshëm të SHBA-së për të eliminuar kartelet, krimin e organizuar ndërkombëtar dhe emigracionin e paligjshëm.

Ndihmës Drejtori Fields zhvilloi takime me Ministrin e Brendshëm Ervin Hoxha, Kreun e SPAK Altin Dumani, Drejtorin e Përgjithshëm së Policisë së Shtetit Ilir Proda, Drejtorin e Përgjithshëm të Agjencisë së Mbikëqyrjes Policore Florian Sulejmani, Drejtorin e Përgjithshëm të Burgjeve Klevis Qose dhe të tjerë.

Përveç kësaj, 340,000 dollarë në pajisje amerikane u transferuan në burgjet shqiptare përmes ICITAP dhe Byrosë kundër Terrorizmit dhe INL të Departamentit të Shtetit. Vizita përfundoi me prezantimin e Çmimit të Ekselencës dhe akreditimin e parë ndërkombëtar IADLEST për Akademinë e Sigurisë.