Prokuroria e Apelit të Juridiksionit të Përgjithshëm ka reaguar zyrtarisht pas ngjarjes së rëndë që tronditi sistemin e drejtësisë, ku gjyqtari Astrit Kalaja u vra brenda sallës së gjyqit në Tiranë.
Në deklaratën për mediat, trupa e prokurorëve shpreh ngushëllimet më të thella për familjen, të afërmit dhe kolegët e gjyqtarit të ndjerë, duke e cilësuar këtë akt si një sulm të rëndë ndaj shtetit ligjor dhe drejtësisë shqiptare.
“Prokuroria e Apelit, e tronditur nga ngjarja kriminale që solli humbjen e jetës së gjyqtarit Astrit Kalaja, shpreh dhe përcjell ngushëllimet më të sinqerta për familjen, të afërmit dhe kolegët e tij”, thuhet në reagim.
Trupa e prokurorëve dënon me forcë vrasjen, duke theksuar se gjyqtari Kalaja ishte një figurë e respektuar dhe një profesionist i palodhur në shërbim të ligjit dhe qytetarëve.
“Dënojmë çdo akt dhune që cënon figurën e magjistratit, sepse sulmi ndaj tij është një sulm i drejtpërdrejtë ndaj shtetit të së drejtës”, vijon deklarata.
Prokuroria paralajmëron gjithashtu se kjo ngjarje duhet të shërbejë si një këmbanë alarmi për shoqërinë dhe institucionet, duke nënvizuar rrezikun që vjen nga “gjuha e urrejtjes, denigrimi i figurës së magjistratit dhe mungesa e respektit ndaj drejtësisë”.
Ngjarja e 6 tetorit, ku gjyqtari Astrit Kalaja u qëllua për vdekje brenda sallës së gjyqit nga i pandehuri Elvis Shkëmbi, ka shkaktuar tronditje të thellë në opinionin publik dhe ka nxitur reagime të forta nga institucionet e drejtësisë dhe komuniteti ndërkombëtar.
Discussion about this post