Presidenti i Federatës Mbretërore Spanjolle të Futbollit, Luis Rubiales i sfidoi të gjithë në Spanjë duke deklaruar se nuk ka ndër mend të japë dorëheqjen nga posti i tij.
Por duket se tashmë ai do të përballet me pasojat e këtij vendimi, që përkeqësojnë pozitat e tij pas puthjes që i bëri futbollistes Jeni Hermoso gjatë ceremonisë së fitores së Kupës së Botës, e për më tepër edhe deklaratave të dala nga zyra për shtyp e institucionit të tij që e cilësonin atë si iniciatore të asaj puthje dhe më vonë gënjeshtare.
Qeveria spanjolle është vënë në lëvizje për të hequr Rubiales dhe Këshilli i Lartë i Sportit ka depozituar kërkesën për pezullimin dhe shkarkimin e tij të menjëhershëm, ashtu siç e parashikon ligji.
FIFA e ka pezulluar Rubiales ndaj ky i fundit nuk mund të veprojë më nëpërmjet institucionit, por akuzat dhe sulmet ndaj tij sa vijën e shtohen.
Sot është bërë e ditur se pas një denoncimi të bërë nga Qendra Kombëtare e Formimit të Trajnerëve të Futbollit, prokuroria ka nisur procedurat për hetimin e tij për “agresion seksual”.
Çështja ka kaluar në gjykatën e Madridit, e cila si hap të parë, ka ftuar për të denoncuar pikërisht futbollisten e përfshirë në këtë ngjarje, Jeni Hermoso.
Prokuroria nuk mund të hapë hetim me kërkesë të palëve të treta, ndaj do t’i kërkojë Hermoso nëse do të bëjë denoncim ndaj Rubiales apo jo.
Ajo ka 15 ditë kohë që të marrë vendimin nëse do të denoncojë apo jo Rubiales, për të cilët duket se kanë marrë fund gjithsesi ditët e tij në drejtimin e futbollit spanjoll dhe tashmë duhet të mendojë se si të shmangë prangat dhe burgun pasi ligjet në Spanjë për çështjet e agresionit seksual janë shumë të rrepta.
Discussion about this post