Prokuroria italiane ka dhënë pretencën për Dritan Rexhepin, i cili u arrestuar para disa muajsh në Ekuador dhe që cilësohet si kreu i një organizate kriminale që drejton trafikun e drogës. Prokuroria italiane ka kërkuar 20 vite burg dhe konfiskimin e pasurisë. Bashkë me të, prokuroria kërkon 18 vite burg për Gerti Markun dhe 19 vite burg për Edmond Markun.
Tri shtete kërkojnë ekstradimin e 40-vjeçarit nga Vlora, i cili është arratisur jo pak herë nga burgu. Në vitin 2021, ai ka përfunduar dënimin në burgun e Guayaquil në Ekuador dhe tashmë prej disa javësh ai paraqitet pranë autoriteteve dhe mbahet në vëzhgim prej tyre.
Dritan Rexhepi rezulton i dënuar në mungesë me 25 vite burgim në Shqipëri, për vrasjen e dy policëve në Fushë-Krujë, Arben Keqi e Durim Kasmi, ngjarje kjo e ndodhur në vitin 1998. Por pavarësisht këtij dënimi, është arritur të mësohet se në vitin 2013, ai ka hyrë në territorin shqiptar me emrin Lulzim Murataj e nuk është pikasur nga autoritetet.
Fillimisht, ai është arrestuar në 2007 në ambientet e “Hotel Tirana” së bashku me Nadien Zenelin. Pas arrestimit është transferuar në Durrës, pasi oficerët e Drejtorisë së Policisë Durrës kishin kryer të gjithë operacionin për zbulimin dhe prangosjen e tij. Këtu ndodhi edhe arratisja e tij e parë. Rexhepi në fakt ka mundur tu ikë nga ambientet e komisariatit të policisë Durrës, pasi oficeri Albert Strati dhe zëdhënësja e policisë së Durrësit, e kishin nxjerrë nga dhoma e shoqërimit, për t’i bërë një foto, me qëllim publikimin e lajmit të arrestimit të tij, në shtypin e kohës. Ai u largua në momentin që sapo u fut në qeli pas marrjes në pyetje, pasi dera e qelisë ishte lënë hapur. Në vetëm pak sekonda, Rexhepi ndodhej në rrugë i lirë. Rexhepi ka mundur që të arratiset edhe nga burgu i sigurisë së lartë i Pavias, të Italisë, së bashku me dy shqiptarë të tjerë. Në korrik të 2011-s, ai u arrestua për grabitjen e një prej bankave më të mëdha në Barcelonë, por arriti që të arratisej sërish.
Discussion about this post