Prokuroria ka akuzuar ish-kryebashkiakun e Vorës Agim Kajmaku, që përpos se u kap me 20 kg kokainë në Itali, ishte në kërkim edhe nga drejtësia shqiptare, për falsifikim dokumentesh.
Organi i akuzës shprehet se ka ndjekur procesin ndaj Kajmakut, pasi ai nuk ka plotësuar në rregull formularin e dekriminalizimit dhe se çështja është apeluar. Pas arrestimit të Kajmakut në Itali me 20 kg kokainë, Prokuroria ka bërë me dije se kishin ankimuar vendimin kundër Shkallës së parë që në muajin shkurt, duke ngulmuar se ish-kryebashkaku ishte i fajshëm për veprat penale të “Falsifikim i vulave, stampave ose i formularëve”.
Ai akuzohet për falsifikim të të formularëve dhe ushtrim i funksioneve pas dhënies fund të detyrës. Ndërkohë, akuza e fundit që i’u shtua atij ishte një vendim i marrë pas shkarkimit nga Komisioni Qendror i Zgjedhjeve.
Pas shkarkimit nga KQZ, Kajmaku ka hequr nga detyra dy nënkryetarët e Bashkisë, Hekuran Brahimaj dhe Laureta Omeri duke vendosur si të vetmin nënkryetar shefin e Kabinetit Gent Picari, megjithëse edhe vetë ishte zyrtarisht i shkarkuar si kreu i bashkisë Vorë.
Agim Kajmaku u zgjodh në krye të Bashkisë Vorë në zgjedhjet e 30 qershorit 2019, por u denoncua nga PD se kishte fshehur dënimin në Greqi për falsifikim parash dhe se kjo nuk ishte deklaruar në formularin e dekriminalizimit.
Fillimisht kjo u mohua prej tij, por më pas u vërtetua nga prokuroria e Tiranës përmes një letërporosie dërguar autoriteteve greke se ai ishte në kërkim në 2003 për falsifikim të kartëmonedhave dhe nuk ishte arrestuar pasi kishte ikur në Shqipëri.
Kujtojmë se disa ditë më parë Agim Kajmaku u arrestua nga policia italiane pasi u kap me 20 kilogramë lëndë narkotike e llojit kokainë.
Discussion about this post