Prokurorja e Tiranës Elsa Kareçi, do të përballet të martën më 12 korrik me Komisionin e Pavarur të Kualifikimit. Procesi i saj i vetingut po kryhet nga trupa e përbërë nga Suela Zhegu, Brunilda Bekteshi dhe Firdes Shuli.
Elsa Kareçi përfundoi studimet në Shkollën e Magjistraturës në vitin 2004 dhe u emërua si prokurore në Prokurorinë e Kavajës. Ajo e ushtron funksionin në Prokurorinë e Tiranës prej vitit 2007. Analiza e pasurisë është një ndër tre shtyllat e rivlerësimit për prokurorët, së bashku me kontrollin e figurës dhe vlerësimin e aftësive profesionale.
Në deklarimin për të herë të parë në vitin 2003, prokurorja Elsa Kareçi deklaronte vetëm pjesë takuese të një toke bujqësore të përfituar nga familja e saj përmes ligjit 7501. Në fund të vitit 2016, pasuria e saj familjare llogaritet në 373 milionë lekë.
Pjesa kryesore e pasurisë familjare përbëhet nga aksionet e bashkëjetuesit të subjektit në kompaninë “Miami Beach” me kapital të deklaruar prej 334.1 milionë lekësh, ku ai zotëron 51% të aksioneve.
Ata deklarojnë gjithashtu pasuri të patundshme me vlerë 10 milionë lekë, likujditete bankare prej 185 mijë lekësh, kursime në cash prej 285 mijë lekësh si dhe një automjet me vlerë 200 mijë lekë. Gjithashtu, bashkëjetuesi i subjektit deklaron huamarrje për biznes në vlerën 28 milionë lekë.
Të ardhurat familjare për periudhën deklaruese janë 23.9 milionë lekë, nga të cilat 51% burojnë nga paga e Znj. Kareçi, gati 31% nga të ardhurat e familjarëve si dhe 5.3% nga shitja e automjeteve.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik për 13 vite të deklarimit, asnjë prej deklaratave nuk rezultoi me probleme.
Nga analiza cilësore e deklaratave të pasurisë, BIRN identifikoi disa “flamuj të kuq”, të cilat lidhen kryesisht me pasuritë e deklaruara nga bashkëjetuesi.
Në vitin 2003, subjekti Elsa Kareçi deklaron të zotërojë 16.8% pjesë nga 18 dynym tokë përfituar nga ligji numër 7501, për të cilën nuk jep vendodhje apo vlerë aseti. Në vitin 2004, subjekti deklaron të zotëroje 25% nga 400 m2 sipërfaqe truall ndërtimi me vlerë të deklaruar në 128,000 lekë si dhe 1/6 pjesë nga apartament banimi në vlerë 7,649 lekë blerë më 11.10.1995.
Në vitin 2014, bashkëjetuesi i subjektit deklaron për herë të parë pasurinë, mes së cilave një shtëpi banimi në Tiranë të dhuruar nga prindërit, tokë bujqësore në Tiranë dhe në Bajzë të Shkodrës me vlerë respektive 30,000 euro dhe 50,000 USD si dhe aksione në shoqëritë “Shpata shpk”, me kapital themeltar me vlerë 100,000 ALL si dhe “Miami Beach” me kapital themeltar me vlerë 334’114’740 lekë, ku zotëron 51% të aksioneve.
Në vitin 2014, bashkëjetuesi i subjektit deklaron gjithashtu një hua me vlerë 200,000 euro të marrë në vitin 2008 për biznes si dhe një hua të dytë prej 200,000 eurosh nga fabrika e pasurimit të kromit në Bulqizë (në momentin e deklarimit janë shlyer 105,000 euro dhe 4,000,000 lekë). /Birn
Discussion about this post