Një hetim i nisur fillimisht nga Prokuroria e Vlorës për dyshimet mbi falsifikimin e dokumenteve dhe tjetërsimin e pronave në zonat e Rradhimës, Dukatit dhe Orikumit është transferuar tashmë në Prokurorinë e Posaçme kundër Korrupsionit dhe Krimit të Organizuar (SPAK).
Prokuroria e Vlorës ka shpallur moskompetencën për çështjen dhe ia ka kaluar dosjen SPAK-ut, i cili, mbi bazën e kallëzimeve të depozituara nga banorët e zonës, ka regjistruar procedimin penal dhe ka nisur veprimet hetimore. Paralelisht, SPAK ka kërkuar edhe të gjithë aktet e hetimit paraprak të kryera nga Prokuroria e Vlorës për këtë çështje.
Bazuar në materialet hetimore të administruara, SPAK dhe Prokuroria e Vlorës kanë zhvilluar kontrolle në disa banesa në qytetin e Vlorës, si edhe në zyrat e Agjencisë Shtetërore të Kadastrës (ish-Hipoteka). Hetimet lidhen me dyshimet se sipërfaqe të konsiderueshme toke bujqësore në Orikum, Dukat dhe Rradhimë janë tjetërsuar dhe regjistruar në mënyrë të paligjshme përmes dokumenteve të falsifikuara, duke nxjerrë jashtë procesit të pronësisë banorët që kishin përfituar tokën sipas ligjit nr. 7501 “Për Tokën”.
Sipas kallëzuesve, në këtë skemë dyshohet se janë përfshirë persona me influencë ekonomike, në bashkëpunim me individë vendas.
Kallëzimet penale janë depozituar nga një grup banorësh të Kuvendit të Orikumit, Rradhimës dhe Dukatit, si në Prokurorinë e Vlorës ashtu edhe në SPAK. Në to ngrihen dyshime për veprat penale të “Shpërdorimit të detyrës” dhe “Falsifikimit të dokumenteve”, të kryera në kuadër të një “Grupi të strukturuar kriminal”.
Hetimet pritet të përqendrohen në verifikimin e dokumentacionit të pronësisë, identifikimin e personave të përfshirë dhe ligjshmërinë e regjistrimeve të pronave në zonat bregdetare, të cilat kanë një vlerë të lartë ekonomike.
Discussion about this post