Prokuroria e Tiranës ka kërkuar sekuestrimin e pasurive të Elton Arkaxhiut, një shqiptari të dënuar në Francë për ‘Trafikim të lëndëve narkotike’ dhe i proceduar në 2011 nga organet shqiptare për ‘Pastrim të produkteve të veprës penale’.
Sipas organit të akuzës, Arkaxhiu ka në pronësi Bar-kafe “Rio”, që ndodhet në rrugën “Besim Imami”, në afërsi të karburantit në rrugën “Myslym Shyri”. Ky biznes me sipërfaqe totale 108 m² është blerë prej tij në datë 21.10.2005. Po ashtu ai zotëron një ambient biznesi po në rrugën “Besim Imami”, te “Myslym Shyri”, që aktualisht përdoret si Qendër SPA.
Për të dyja pasuritë, prokuroria ka kërkuar sekuestron në gjykatë, bashkë me një pasuri të llojit truall, me sip.71.52m2 dhe ndërtesë 37.52m2, me vendndodhje në Tiranë.
“Zyra e Interpolit ka konfirmuar se shtetasi E.A., nga verifikimet e kryera nga Interpol Francë, rezulton se ka qenë subjekt i procedurave të pjesëmarrjes në organizatë kriminale me subjekt kryesisht të trafikut ndërkombëtar të drogës, përdorimit te produkteve narkotike, importimit të mallrave kontrabandë dhe mallrave që paraqesin rrezik për jetën, etj. Prokuroria nga hetimi arriti në përfundim se ka mospërputhshmëri të burimit të financimit (të ardhurave + huamarrje) me pasuritë e dokumentuara”, njofton prokuroria.
Discussion about this post