Një zhvillim i rëndësishëm ka ndodhur sot në Bashkinë e Tiranës, ku Komisioni i Çështjeve Ligjore i Këshillit Bashkiak vendosi të refuzojë kërkesën e kryebashkiakut të arrestuar, Erion Veliaj, për të qenë i pranishëm në mbledhjen ku do të diskutohet dhe votohet shkarkimi i tij. Kërkesa u refuzua edhe me votat e këshilltarëve të Partisë Socialiste, të cilët një ditë më parë kishin propozuar shkarkimin e Veliajt.
Mbledhja e Komisionit u shoqërua me debate të forta mes përfaqësuesve të Partisë Socialiste dhe atyre të Partisë Demokratike. Ndonëse këshilltarët demokratë bashkuan votat me socialistët për të kaluar projektvendimin për shkarkim, ata shprehën rezerva të forta mbi refuzimin e kërkesës së Veliajt për t’u dëgjuar.
Dorian Teliti nga Partia Demokratike theksoi se edhe një person i dënuar ka të drejtën ligjore për t’u dëgjuar, duke e cilësuar vendimin për të mos lejuar praninë e Veliajt si një “instrument ligjor” që mund t’i shërbejë atij në gjykatë. “Ne duam t’ia themi në sy korrupsionin e tij, jo me korrespondenca mediatike, por aty në sallë,” tha Teliti.
Nga ana tjetër, Endri Shabani argumentoi se nuk ka asnjë arsye përse duhet të lejohet kryebashkiaku të jetë i pranishëm, duke theksuar se kushtet ligjore për shkarkim janë pjekur.
Një ditë më parë, Veliaj i dërgoi një letër Këshillit Bashkiak duke kërkuar të marrë pjesë fizikisht në mbledhje. Sekretari i Këshillit, Behar Zeneli, iu përgjigj se Veliaj mund të dërgojë pretendimet e tij me shkrim, nëse nuk mund të paraqitet fizikisht. Veliaj e kundërshtoi këtë, duke i kujtuar se Sekretari nuk mund të marrë rolin e një organi kolegjial dhe se e drejta e tij për t’u dëgjuar duhej vendosur nga vetë Këshilli.
Procedura për shkarkimin e Veliajt filloi pas kërkesës së kryeministrit Edi Rama në Asamblenë e PS-së, duke u bazuar në nenin 62, gërma C të Ligjit 139/2015 “Për Vetëqeverisjen Vendore”. Ky nen parashikon shkarkimin e kryebashkiakut në rastin e mosparaqitjes në detyrë për të paktën 3 muaj, një kusht i plotësuar pasi Veliaj ndodhet në paraburgim që nga 10 shkurti i 2025.
Për t’u miratuar, projektvendimi për shkarkimin kërkon të paktën 31 vota pro nga 61 këshilltarët e Këshillit Bashkiak. Pas miratimit, vendimi i kalon Këshillit të Ministrave përmes Prefektit të Tiranës. Megjithatë, edhe nëse shkarkohet, Veliaj ka të drejtën kushtetuese të ankimojë vendimin në Gjykatën Kushtetuese brenda 15 ditësh. Në këtë rast, vendimi i qeverisë pezullohet deri në shqyrtimin nga Gjykata. Veliaj vetë ka paralajmëruar se do ta mbrojë “deri në fund” kontratën e tij 4-vjeçare me qytetarët e Tiranës.
Veliaj u arrestua me urdhër të GJKKO-së dhe akuzohet nga SPAK-u për 13 vepra penale, mes të cilave 9 raste korrupsioni.
Discussion about this post