Në mbledhjen e përbashkët të Këshillit për Legjislacionin dhe Komisionit për Çështjet Ligjore, avokatja e Popullit Erinda Ballanca vuri theksin tek ndryshimet në hartën tradicionale.
Sipas Ballancës, propozimet për ndryshimet kushtetuese të Partisë Demokratike janë të vlefshme, ndërsa shtoi se duhet një reformë e re territoriale.
“Fakti është se niveli dhe shërbimi për qytetarët ka pasur përkeqësim, këtë e ndjejmë nga raportet e monitorimit. Nga kjo qasje mendojmë se duhet një reformë e re territoriale për të adresuar nevojat e qytetarëve veçanërisht në qytetet e vogla dhe zonat rurale. Me këtë ndarje, disa komunitete minoritare janë ndarë, një ndarje e re territoriale duhet të adresojë dhe këtë çështje”, tha Ballanca.
Sa i përket propozimet për ndryshime në Kodin Zgjedhor, Ballanca tha se raportet e OSBE në dy vitet e fundit kanë vënë theksin te kthimi i besimit të zgjedhësve te zgjedhjet.
Për Vettingun në Politikë, ajo nuk preferoi të komentojë pasi sipas saj është në konflikt interesi sepse pozicioni i saj parashikohet si objekt i Vettingut në Politikë, i propozuar nga Partia Demokratike.
Discussion about this post