“Arrestoni Ramën, ju erdhi fundi”/ Mbyllet protesta e 104-të kundër qeverisë, të shtunën diaspora në shesh

Është mbyllur protesta e 104-të kundër qeverisë në Tiranë, pas disa orësh marshim dhe tubim në rrugët e kryeqytetit.

Protestuesit nisën marshimin nga sheshi “Skënderbej”, u stacionuan para Kryeministrisë dhe më pas vijuan drejt Ambasadës së Malit të Zi, në shenjë proteste për ndalimin e autokolonës me shqiptarë të diasporës në Nikshiq.

Gjatë protestës u dëgjuan një sërë thirrjesh kundër qeverisë dhe kryeministrit Edi Rama, ndërsa protestuesit kërkuan edhe arrestimin e Ramës dhe ish-zëvendëskryeministres Belinda Balluku.

Pasi u ndalën për pak momente tek Rruga e Elbasanit, ata bënë thirrje në kor kundër qeverisë.

“Arrestoni Ramën”, “Shqipëria e shqiptarëve, jo e tradhtarëve”, ishin disa nga thirrjet e tyre.

Në përfundim të tubimit, protestuesit e mbyllën me thirrjen “Nesër më shumë!”, duke paralajmëruar vijimin e protestave.

Ndërkohë, vëmendja zhvendoset te dita e shtunë, kur pritet zhvillimi i një tubimi kombëtar, ku pritet të marrin pjesë edhe shqiptarë të diasporës që kanë udhëtuar drejt Shqipërisë. Organizatorët kanë bërë thirrje për pjesëmarrje masive në protestën e së shtunës.

gijotina.com/

Etiketa: Kryesore1 protesta