Deputeti Vangjel Dule tha sot në Kuvend se dhuna e ushtruar ndaj protesuesve në Zvërnec, nga rojet private, ka qenë e porositur nga vetë kryeministri Edi Rama. Sa i përket pretendimeve të disa qytetarëve se kanë pronësinë e disa sipërfaqeve në zonën ku është planifikuar të ndërtohet resorti, Dule tha se shteti duhet të pezullojë vazhdimin e investimit deri në sqarimin e së vërtetës.
“Dhunuesit ishin të njëjtë në të njëjtën kohë dhe grabitësit, ata që në emër të zhvillimit nuk pyetnin për trashëgiminë, për natyrën, nuk pyetnin as për të drejtat e pronës. Pyetja është: ku e gjen guximin grabitësi të ketë të njëjtën kohë dhunuesin? Kjo vjen vetëm kur ka mbështetjen e plotë dhe pa rezerva të pushtetit, dhe pushteti në këtë vend i takon vetëm Edi Ramës.
Dhunuesit dhe grabitësit vepronin me urdhër dhe me porosi dhe në emër të Edi Ramës. Solli në këtë Kuvend ligjin për shtyrjen e investimeve strategjike deri në fund të vitit 2027, në të njëjtën kohë bën karshillëk në BE dhe shtiret se kemi vështirësi të kthejmë pronat.
Në një kohë që nuk bën atë që do bënte çdo shtetas i ndershëm, që do të thotë të pezullojë çdo investim strategjik deri sa të zgjidhet çështja e pronave”,- tha Dule.
Kryetare e Komisionit për Burimet Natyrore, Infrastrukturën dhe Zhvillimin e Qëndrueshëm, Anila Denaj, është shprehur se Shqipëria sot ka nevojë për turizmin elitar.
Komentet Denaj i bëri gjatë fjalës së saj në Kuvend, diskutohej mbi ndërtimin e resortit turistik në Zvërnec, projekt që po kundërshtohet fuqishëm nga banorët e zonës dhe qytetarët.
Denaj shtoi gjithashtu se çështja e pronave nuk është çështje për t’u diskutuar dhe për të marrë ‘vëmendjen’ e seancës plenare, por sipas saj, është çështje për t’u shqyrtuar në gjykatë.
“Investimet e huaja direkte, vetëm vitin e shkuar arritën në 1.63 miliardë euro dhe stoku i investimeve të huaja është në 17 miliardë euro. Janë gati 18 mijë kompani të huaja që operojnë në Shqipëri, që punësojnë një numër të konsiderueshëm ekspertësh e punonjësish shqiptarë. Janë 7800 biznese, që vetëm në 4 muajt e parë të këtij viti, i janë shtuar numrit të bizneseve në Shqipëri. PBB ka arritur në 27 miliardë euro. Ne gjejmë debatin politik për të hedhur baltë, për çështje që nuk janë pjesë e këtij diskutimi. Procesi i tokave nuk është pjesë e kësaj foltoreje, por është pjesë e proceseve të gjykatës. Është një proces jo i lehtë dhe i nisur që nga viti 1991 dhe i trashëguar në vite, sigurisht nga të gjitha administratat. Prandaj nuk mund të përdoret sot për retorikë politikë. Sot kemi mundësinë të mësojmë edhe nga historia e vendeve fqinj, që mezi u ringritën në turizmin që e kanë pjesën më të rëndësishme të tyre, pas krizave të cilat i kaluan me sukses, por jo me lehtësi. Ne kemi mundësi jo vetëm për turizmin e thjeshtë, por edhe për atë elitar. Që të kemi mundësi që shumë turistë elitarë të mos kalojnë përgjatë Mesdheut e të mos ndalojnë në Zhqipëri, por ta ngulin flamurin edhe në vendin tonë”, tha mes të tjerash Denaj.
gijotina.com/
Discussion about this post