Drejtori i Përgjithshëm i Policisë së Shtetit, Skënder Hita, ka bërë të ditur se 167 persona janë arrestuar, ndërsa 388 të tjerë janë proceduar pas protestave të zhvilluara në Tiranë.
Në një deklaratë për mediat, Hita u shpreh se gjatë tubimeve janë regjistruar dëmtime të pronës publike dhe private, ndërsa janë sekuestruar bomba molotov, llastiqe dhe sende të tjera. Sipas tij, nga incidentet kanë mbetur të dëmtuar 132 punonjës policie.
Kreu i Policisë bëri gjithashtu të ditur se shtatë punonjës policie janë pezulluar nga detyra dhe ndaj tyre ka nisur hetimi disiplinor.
Ai theksoi se efektivët janë udhëzuar të zbatojnë procedurat standarde gjatë ndërhyrjeve, duke argumentuar se përdorimi i mjeteve policore bëhet në përputhje me kuadrin ligjor dhe nivelin e përshkallëzimit të situatës.
Hita ngriti gjithashtu shqetësimin për thirrjet që, sipas tij, po publikohen në disa grupe të rrjeteve sociale, ku bëhet apel për sulme ndaj punonjësve të policisë me mjete djegëse dhe shpërthyese. Ai deklaroi se Policia ka marrë masa për identifikimin dhe kapjen e personave të përfshirë në këto veprime.
Në përfundim, kreu i Policisë u bëri thirrje qytetarëve të distancohen nga aktet e dhunshme, ndërsa prindërve u kërkoi të mos lejojnë pjesëmarrjen e të miturve në protesta.
gijotina.com/
Discussion about this post