Protesta bllokon aksin Thumanë-Kashar, banorët përleshen me policinë

Banorë të zonës përreth aksit të ri Thumanë-Kashar kanë protestuar sërish ditën e sotme, pasi kërkojnë akses në autostradën e sapoinauguruar.

Protestuesit përveçse kanë bllokuar qarkullimin për automjetet janë përplasur edhe me efektivët e policisë prezentë në tubim.

Mësohet gjithashtu se autoritetet kanë përdorur edhe spraj djegës ndaj protestuesve, ndërsa është vendosur edhe një tel me gjemba për të ndaluar bllokimin e aksit.

“I bëjmë thirrje shtetit të na hapë rrugën dhe ta paguajmë. Neve na është hequr buka e gojës. Nëse këta duan që të na heqin këtë mënyrë dhe të merremi me drogë… ne nuk jemi për këtë punë. Kemi vetëm një kërkesë, të na hapet rruga dhe ta paguajmë”, u shpreh një prej protestuesve.

Edhe pse përleshjet me efektivët e policisë nuk janë ndalur, këta të fundit kanë arritur të sigurojnë qarkullimin e një pjese të automjeteve.

Megjithatë kjo nuk ka ndaluar protestuesit, të cilët me pankarta në duar kanë vijuar marshimin e tyre përgjatë aksit, ndërsa kanë bërë edhe thirrje për sigurimin e aksesit të tyre në rrugë.

Një protestë e tillë u mbajt edhe në datën 24 korrik, ku banorët patën dhe përplasje me policinë.

gijotina.com/