Opozita ka thirrur një protestë në 20 shkurt, një datë simbolike kjo, pasi 33 vite më parë u rrëzua shtatorja e diktatorit Enver Hoxha nga sheshi “Skënderbej”.
Ish-Kryeministri Sali Berisha në pothuajse të gjitha mesazhet e tij e konsideron 20 shkurtin si një ditë ku shqiptarët duhet të marrin në dorë fatet e tyre, madje ka paralajmëruar Kryeministrin Edi Rama se në këtë ditë do të përballet me shqiptarët.
Prej disa ditësh, deputetë të PD-së janë bashkuar pas një ndarje 2-vjeçare dhe kanë nisur bashkarisht takimet në funksion të protestës. Në prag të saj, drejtues të disa prej partive opozitare kanë finalizuar edhe një dokument për krijimin e një federate opozitare, të cilës i janë bashkuar deri më tani Agron Duka, Fatmir Mediu, Ilir Meta, Vangjel Dule, deputetët e PD-së, si dhe disa parti jo parlamentare.
Në prag të protestës në rrjet është shpërndarë edhe një video me mesazhet e pothuajse të gjithë deputetëve dhe figurave kryesore të opozitës, që iu kërkojnë qytetarëve të bashkohen në Tiranë dhe të protestojnë.
“20 shkurt, të gjithë në Tiranë”, është thirrja e përbashkët që pothuajse të gjitha rrymat në PD ia drejtojnë shqiptarëve.
Discussion about this post