Protesta e 3 Marsit, nis blindimi i dyerve të Kryeministrisë

Dyert e Kryeministrisë kanë nisur të blindohen një ditë përpara protestës së thirrur nga Partia Demokratike.

Dy javë më parë, pas mbledhjes së kryesisë, kreu i PD Sali Berisha lajmëroi protestën kombëtare më 3 mars.

Protesta, që nis në mesditë, mbahet në të njëjtën ditë kur zhvillohet seanca gjyqësore mbi vendimin e Apelit për logon e PD-së.

Policia e Tiranës ka zbuluar edhe planin e masave që do të ndërmerren për mbarëvajtjen e protestës të thirrur nga opozita të premten.

Sipas policisë, duke filluar nga ora 06:00 e datës 03.03.2023, nuk do të lejohet parkimi i automjeteve, në rrugët e poshtëshënuara:

Bulevardi “Dëshmorët e Kombit”, sheshi “Nënë Tereza”, rruga “Ismail Qemali”, nga kryqëzimi i Rrugës së Elbasanit me rrugën “Ibrahim Rugova”, rruga “Papa Gjon Pali II”, bulevardi “Zhan D’Ark” dhe bulevardi “Bajram Curri”, nga kryqëzimi i Rrugës së Elbasanit me rrugën “Ibrahim Rugova”.