Ashtu siç u paralajmërua sot banorët e zonës “5 Maji” në Tiranë kanë dalë në protestë kundër shembjes së ndërtesave të tyre. Forca të shumta policore kanë zonën, pasi protestuesit kanë bllokuar rrugën për të mos kaluar fadromat e IKMT-së.
Burime bëjnë me dije se disa prej banorëve janë shoqëruar nga policia pasi kundërshtuan shembjen e shtëpive. Nuk është hera e parë që në këtë zonë ka përplasje mes qytetarëve dhe policisë.
Nga ana tjetër, shumica e banorëve që janë prekur nga projekti i lagjes së re te “5 Maji” janë dakordësuar dhe kanë filluar nënshkrimin e marrëveshjeve me Bashkinë e Tiranës për t’u pajisur me shtëpi, sipas VKM-së së miratuar nga qeveria në shtator të 2021, nëpërmjet procesit të kompensimit përmes shkëmbimit.
Sipas VKM-së së miratuar nga qeveria në shtator të 2021, sigurohet se të gjithë banorët që preken nga ky projekt do të përfitojnë kompensim të plotë, nëpërmjet shkëmbimit të pronës së tyre me objektet e reja që do të ndërtohen në lagjen e re. Po kështu, poseduesit e banesave në proces legalizimi, tashmë do të përfitojnë të njëjtën sipërfaqe në metra katrorë, në godinat e reja që po ngrihen në të njëjtën zonë.
Discussion about this post