Protesta e banorëve në Zall Herr, 15 vite pa asnjë investim në rrugë

Ditën e sotme, banorët e disa fshatrave në afërsi të zonës së Zall Herrit protestuan për mungesën e infrastrukturës.

Banorët shprehen se nuk kanë rrugë, kështu që dhe dërgimi i fëmijëve të tyre në shkolla mund të vihet në pikëpyetje.

Banorët e fshatrave Zall-Herr, Pinar, Priskë e Vogël dhe Herraj  janë mbledhur në protestë dhe kanë bllokuar qarkullimin, në rrugën kryesore që lidh pjesën më të madhe të fshatrave me njësinë administrative Zall-Herr.

Banorët kërkojnë asfaltimin e rrugës nga njësia administrative në Zall-Herr deri në urën e fshatit Herraj me një distancë afërsisht 3.5 km.

Autoritetet prej 15 vitesh nuk kanë investuar në stabilizimin e situatës, prandaj banorët kërkojnë asfaltimin e saj sa më shpejt të jetë e munduar, pasi rreth 350 familje që preken nga rruga e shkatërruar nuk kanë si të dërgojnë fëmijët në shkollë.

Një tjetër problem për rrugën kanë qenë dhe mjetet e tonazhit të rëndë, të cilat gjatë qarkullimit të vazhdueshëm e kanë dëmtuar shumë këtë aks.

“Asnjë investim për rrugën prej 15 vitesh. Nuk i dërgojmë dot fëmijët në shkollë se nuk kemi rrugë. Ne kërkojmë vetëm rrugë dhe ujë. Kaq duam nga shteti’- thonë banorët.