Protesta e Berishës, Basha: Hera e parë që një politikan i shpallur “non grata”, del kundër partisë së vet

Kryetari i Partisë Demokratike, Lulzim Basha ka reaguar për protestën e thirrur nga ish-kryeministri, Sali Berisha në datën 8 janar para selisë blu.

Në një postim në Twitter, Basha shkruan se është hera e parë në historinë e Shqipërisë që një politikan i lartë shpallet i padëshiruar nga SHBA, dhe po hera e parë në Shqipëri që ai thërret një protestë kundër partisë së tij, Partisë Demokratike.

Sipas Bashës, kjo bëhet me të vetmin qëllim të Berishës për t’u strehuar dhe për t’u mbrojtur.

“Hera e parë në historinë e Shqipërisë që një politikan i lartë shpallet i padëshiruar nga SHBA, dhe po hera e parë në Shqipëri që ai thërret një protestë kundër partisë së tij – Partisë Demokratike, me motivin pse ajo nuk kthehet në bunker ku ai mund të ‘strehohet’ për t’u mbrojtur” – shkruan Basha në Twitter.