Pak minuta më parë ka nisur protesta që ishte paralajmëruar nga ish- kryeministri Sali Berisha, për të kundërshtuar takimin që Rama-Vuçiç-Zaev që do të zhvillohet ditën e nesërme. Marshimi i militantëve nisi në orën 16:00 nga selia blu dhe vijon tek Kryeministria. Mbështetës e Berisha janë mbledhur para kryeministrisë, nga ku kanë bërë deklarata të fortë ende pa nisur mirë protesta. Ata kanë lënë një pankartë në hyrjen e selisë blu me mesazh ndaj SHBA-së “Mbahu Vietnam, kujdes spiunët”, duke akuzuar qeverinë se me bashkëpunim që po bënë me Vuçiç, po e largon vendin nga marrëdhënia e mirë që ka me SHBA. Nga ana tjetër, Berisha në një postim në llogarinë e tij në Facebook të bërë më herët gjatë së hënës radhiti katër arsye se përse qytetarët, sipas tij, duhet të marrin pjesë në protestën e sotme.
“Vuçiç është ministër i Millosheviçit. Ai akoma nuk ka kërkuar falje për krimet e kryera ndaj shqiptareve nga Serbia dhe vazhdon te ndjek politiken e shefit te tij! Ballkani i Hapur është projekt qe e rrit dhe forcon Serbinë dhe planet e Serbisë se Madhe andaj nuk duhet lejuar asesi që të konkretizohet! Edi Rama po bëhet pjesë e këtyre agjendave dhe është bere një kukull e Vuçiçit, andaj duhet ta ndalim para se të behet vonë. Kosova ka akoma plagë të hapura për të cilat Vuçiç është nga përgjegjësit kryesor”, shkruan ai. Pritet që gjatë këtij organizimi, folës të jenë Aldo Bumçi, Melihate Termkolli, Bujar Nishani, Albana Vokshi, Belind Këlliçi, Edith Harxhi, Megi Balliu, Ylli Manjani dhe Sali Berisha.
Ndërkohë, qeveria ka marrë masa për të mos lejuar ndërhyrjen e protestuesve në Kryeministri dhe furgonë dhe forca të shumta policie janë pozicionuar pas godinës së Kryeministrisë dhe e kanë blinduar totalisht atë. Mësohet se do të jenë rreth 2000 forca policie që do të angazhohen për të siguruar rendin dhe sigurinë gjatë zhvillimit të protestës. Ndërkohë, në bulevardin ‘Dëshmorët e Kombit’ janë vendosur flamujt e Maqedonisë së Veriut, të Serbisë dhe të Shqipërisë. Ndërkohë që në Bulevard, përpara Kryeministrisë është duke u bërë gati skena dhe podiumi ku do të mbajnë fjalën drejtuesit e protestës.
Discussion about this post