Protesta e deputetëve të opozitës, jehonë në mediat ndërkombëtare

Mediat ndërkombëtare i kanë bërë jehonë protestës së deputetëve të opozitës në Parlamentin shqiptar.

Agjensi ndërkombëtare të lajmeve, si dhe mediat amerikane, kanë pasqyruar zhvillimet politike në Shqipëri, duke iu referuar burimeve apo raportimeve të pavarura.

Ligjvënësit shqiptarë të opozitës shkaktuan trazira të enjten në Parlament, duke u përpjekur të ndërpresin një seancë në shenjë proteste kundër asaj që ata thonë se është një sundim gjithnjë e më autoritar nga socialistët në pushtet, shkruan Associated Press.

Ligjvënësit demokratë bllokuan socialistët e majtë të kryeministrit Edi Rama të zinin vendet e tyre dhe vendosën karriget njëra mbi tjetrën në sallën qendrore. Demokratët hodhën fishekzjarrë tymi dhe madje shtynë disa prej socialistëve.

Megjithatë, seanca në dhomën prej 140 anëtarësh vazhdoi dhe 73 ligjvënës socialistë votuan pro 21 projektligjeve.

Sali Berisha, kreu i një grupi në Partinë Demokratike të qendrës së djathtë, shumë të ndarë, e përshkroi përleshjen në parlament si një “grevë të përkohshme” dhe tha se demokratët do të vazhdonin me veprime të tilla për sa kohë që “parlamenti i turpshëm” vazhdon të ecë përpara.

“Ata nuk e respektuan grevën tonë,” tha ai për socialistët.

Trazirat në parlament nisën për herë të parë dy javë më parë, dy ditë përpara se prokurorët të akuzonin Berishën e Partisë Demokratike për korrupsion.

Prokurorët e çështjes pretendojnë se 79-vjeçari Berisha i ka dhënë favore  dhëndrit të tij, 50-vjeçarit Jamarber Malltezi. Berisha muajin e kaluar tha se zyra e prokurorit përgjegjës për rastet kundër zyrtarëve të lartë apo çështje të mëdha e kishte urdhëruar atë të mos largohej nga vendi.

Zhvillimet politike në Shqipëri janë pasqyruar edhe në Washington Post, Abcnews, dhe shumë prej mediave të tjera ndërkombëtare.​