Mbi 15 persona janë shoqëruar në komisariatin e policisë së Lushnjes pas protestës së fermerëve që u zhvillua pranë kthesës së Plugut, në hyrje të qytetit.
Burime për Gijotina.com bëjnë me dije se në mesin e të shoqëruarve është edhe kreu i sindikatës së fermerëve, Eduard Sharka, me pretendimin e tubimit të paligjshëm dhe bllokimin e qarkullimit të mjeteve. Në shenjë sensibilizimi me fermerët e arrestuar, dhjetëra të tjerë janë grumbulluar në ambientet jashtme të komisariatit, dhe presin lirimin e kolegëve të tyre.
Fermerët e Myzeqesë kanë dalë në protestë duke kundërshtuar paketën e re fiskale të projektbuxhetit 2022, për vendosjen e 10% të TVSH-së për imputet bujqësore, ndërkohe që çmimi i tyre është rritur nga kriza energjetike globale.
“Ne i kërkojmë Edi Ramës të kthejë kokën tek bujqësia. Ne jemi lënë në rrugë dhe kemi besim tek Rama që t’i vendosë gishtin kokës pasi shumë njerëz punojnë tokën në këtë zonë, por asnjë nuk ka marrë subvencion”, tha një agronom.
Edhe pse prodhuesit dhe eksportuesit e fruta perimeve janë ulur disa herë në tavolinë me përfaqësues të ministrisë së Bujqësisë dhe të ministrisë së Ekonomisë, për të mos miratuar heqjen e TVSH-së së rimbursueshme nga 6% në 0%, deri më tani nuk është gjetur një gjuhë e përbashkët.
Për këtë arsye grupi i interesit ka kërkuar që kjo qeveri të aplikojë gjashtë kërkesa që sipas tyre do të ndikojnë në rimëkëmbjen e bujqësisë shqiptare.
Së pari, ata kërkojnë të subvencionet direkte fermeri, jo më pak se 10 lekë për kilogram, të pasqyruar në faturë tatimore. Së dyti, eksportuesit kërkojnë 3 lekë të reja për kilogram, të jepen direkt nga drejtoria e doganave pa procedura burokratike. Kërkesa e tretë lidhet me barazimin e TVSH-së. Pika e katërt parashikon që masa e planifikuar në paketën fiskale për vitin 2022, për të shtuar 10% TVSH-në e imputeve bujqësore, të pezullohet. Së pesti, kërkojnë qeveria të marrë masa për të kontrolluar cilësinë e produkteve bujqësore, dhe të ngrejë laboratore të akredituara të cilat të jenë të aksesueshme nga kush do. Dhe pika e fundit, ata kërkojnë të rregullohen me ligj marrëdhëniet tregtare në sektorin e bujqësisë midis fermerit dhe tregtarëve të cilët nuk paguajnë faturën në kohë.
Fermerët i lanë kohë dy ditë qeverisë që të reflektojë në lidhje me kërkesat e tyre, në të kundërt paralajmëruan se do të dalin sërish në protestë, këtë herë duke bllokuar pa afat qarkullimin e mjeteve.
Discussion about this post