Rreth 400 punonjës policie janë angazhuar në terren në kuadër të ruatjes së rendit dhe sigurisë, ndërsa opozita pritet të nisë një protestë pranë selisë së Parlamentit.
Sipas informacioneve, punonjësit e policisë janë instaluar në zonën rreth Kuvendit, ndërsa krahas efektivëve të Drejtorisë së Policisë së Tiranës, që do të jenë të angazhuar në kordonët e sigurisë, gjithashtu në gadishmëri do të jenë efektivë të FNSH dhe Reparteve “Shqiponja”, të cilët do të ndërhyjnë në rast të incidenteve apo precipitimit të situatës.
Zona ku do të mbahet protesta do të monitorohet nga kamera me rezolucion të lartë, të cilat janë instaluar në kuadrin e protestës, sikundër në afërsi të zonës, janë dislokuar edhe autobotë me ujë.
Protesta është thirrur nga Partia Demokratike e drejtuar nga Sali Berisha, ndërsa ajo zhvillohet në një kohë kur lideri i kësaj partie ndodhet në arrest shtëpie, ndërsa deputetë opozitarë janë përfshirë në atë që e konsiderojnë si aksionin opozitar brenda Kuvendit, pasi mazhoranca i ka mohuar, sikundër shprehen, të drejtat Kushtetuese.
Pritet që protestuesve tu drejtohen me fjalime disa nga deputetët që janë të përjashtuar nga seanca plenare, ndërsa të tjerë, ashtu sikundër ka ndodhur edhe me seancat e shkuara, pritet të bllokojnë foltoren dhe sallën duke mos lejuar mbajtjen e një seance normale.
Discussion about this post