Policia e Tiranës ka njoftuar për masa të posaçme sigurie dhe kufizime të qarkullimit në disa akse kryesore të kryeqytetit pasditen e sotme, për shkak të një proteste të organizuar nga Partia Demokratike. Tubimi, i cili do të mbahet përballë Kryeministrisë nga ora 19:00 deri në orën 21:00, është thirrur nga opozita në shenjë kundërshtimi ndaj vendimit të qeverisë për të ndaluar rrjetin social TikTok në Shqipëri, një vendim që PD e ka cilësuar si një akt censure ndaj lirisë së shprehjes.
Sipas njoftimit zyrtar, Policia ka marrë masa për garantimin e rendit dhe sigurisë publike gjatë zhvillimit të protestës. Për këtë arsye, duke nisur nga ora 14:00, do të ketë bllokime të qarkullimit dhe parkimit të automjeteve në disa segmente rrugore të rëndësishme pranë kryeministrisë, ku do të mbahet edhe protesta.
Konkretisht: Nuk do të lejohet parkimi i automjeteve në bulevardin ”Dëshmorët e Kombit”, në sheshin “Nënë Tereza, në rrugën “Ismail Qemali”, nga kryqëzimi i Rrugës së Elbasanit me rrugën “Ibrahim Rrugova”, në rrugën “Papa Gjon Pali II”, në bulevardin ”Zhan D’Ark” dhe bulevardin ”Bajram Curri”, nga kryqëzimi i Rrugës së Elbasanit me rrugën “Ibrahim Rugova”;
Nga ora 14:00 deri në përfundim të tubimit, do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”.
Policia bën të ditur se, në varësi të dinamikës së protestës, mund të vendosen edhe kufizime shtesë të lëvizjes në zona të tjera të kryeqytetit. Për këtë arsye, qytetarët këshillohen të shmangin lëvizjen me automjete në akset e bllokuara dhe të përdorin rrugë alternative.
Kujtojmë që vendimi i qeverisë për të ndaluar TikTok-un është shoqëruar me reagime të shumta nga opozita, që e cilëson këtë masë si një përpjekje për të kufizuar lirinë e informacionit dhe komunikimit. Nga ana tjetër, autoritetet qeveritare kanë argumentuar se ky vendim ka ardhur për shkak të shqetësimeve mbi sigurinë dhe mbrojtjen e të miturve nga përmbajtje të rrezikshme.
Në protestën e sotme, ka konfirmuar pjesëmarrjen edhe kreu i PD, Sali Berisha.
Discussion about this post