Partia Demokratike ka thirrur sot një protestë kombëtare në atë të cilën e quan si një nisje të një vale protestash deri në arritjen e qëllimeve që është largimi i Edi Rama nga drejtimi i qeverisë pas skandaleve të mëdha të korrupsionit.
Drejtuesi i Departamentit të Shëndetësisë në PD, Ilir Alimehmeti në studion e lajmeve në “Ora Neës” deklaroi se pa hequr të keqen që është kjo mazhorancë, nuk ka zgjedhje të lira e të ndershme në Shqipëri.
Alimehmeti argumentoi se Shqipëria është shndërruar në një diktaturë autoritare, fakt që mbështetet edhe nga raportet e OSBE/ODIHR-it, të cilat sipas tij, konstatojnë se zgjedhjet nuk janë të lira.
“Nuk njihet ndonjë rast ku një diktaturë të jetë rrëzuar vetëm përmes procesit zgjedhor. Për këtë arsye, rruga e vetme për të larguar Edi Ramën dhe për t’i hapur rrugë demokracisë është përballja direkte, protesta dhe presioni i vazhdueshëm qytetar, pasi largimi vullnetar i regjimit është i pamundur”, tha Alimehmeti.
Ai shtoi se në një sistem demokratik funksional, nuk ka rëndësi se cila parti fiton, por fakti që populli fiton përmes mekanizmit të ndëshkimit me votë.
Alimehmeti u shpreh se aktualisht në Shqipëri, qeveritarët firmosin vjedhje milionash dhe cenojnë sigurinë kombëtare pa asnjë shqetësim, pikërisht sepse ata e kontrollojnë votën dhe nuk varen nga qytetarët.
“Kjo situatë ka çuar në dëshpërim të thellë, duke detyruar rininë dhe prindërit të emigrojnë”, nënvizoi ai, duke shtuar se në këtë situatë mosveprimi është gabimi më i madh në politikë; reagimi ndaj të keqes është domosdoshmëri.
Duke iu përgjigjur skepticizmit mbi opozitën aktuale, Ilir Alimehmeti pranoi se asgjë nuk është perfekte, por theksoi se nuk ka një alternativë më të mirë në horizont.
Në këtë kontekst, ai bëri thirrje për pragmatizëm dhe se të gjitha forcat politike dhe faktorët opozitarë duhet të bashkohen rreth emëruesit të përbashkët, largimit të Edi Ramës.
Alimehmeti e cilësoi “Foltoren” si një domosdoshmëri pas përjashtimit të deputetëve nga parlamenti, duke nënvizuar se qëllimi final duhet të jetë liria e zgjedhjes, jo thjesht ndërrimi i logove partiake.
Discussion about this post