Një grup të rinjsh, pjesë e shoqërisë civile, kanë zgjedhur një formë të veçantë proteste në Lezhë, për të shprehur kundërshtitë e tyre, lidhur me marrëveshjen e firmosur në Romë, mes Kryeministrit Edi Rama dhe homologes italiane, Giorgia Meloni, e cila i hap rrugën ndërtimit të një kampi refugjatësh në Shëngjin.
Të rinjtë kanë tentuar që në sheshin para Bashkisë së Lezhës të vendosin një “çadër kamp”, por nuk janë lejuar nga Policia.
Sipas raportimeve, policia e konsideron të paligjshëm vendosjen e çadrës dhe disa forca policore, të rendit dhe të bashkisë, kanë reaguar duke krijuar edhe një përplasje mes tyre dhe të rinjve.
Këta të fundit shprehen kundër ngritjes së kampit të refugjatëve në Shëngjin, i cili në bazë të marrëveshjes që pritet të ratifikohet nga Parlamenti i Shqipërisë, parashikon të presë deri në 3 mijë refugjatë që do të kapen në brigjet italiane.
Marrëveshja është kundërshtuar nga opozita, e cila pritet ta dërgojë në Gjykatën Kushtetuese, sikundër ka prodhuar polemika në Itali, mes Qeverisë së djathtë dhe opozitës së majtë.
Discussion about this post