Dhjetëra mijëra persona protestuan të shtunën në qytete të ndryshme të Spanjës, përfshirë Madridin, Barcelonën dhe Valencian, duke kërkuar uljen e qirave, ndalimin e dëbimeve dhe më shumë mbrojtje për qiramarrësit
Rreth 50 marshime u zhvilluan në të gjithë vendin, ndërsa në Valencia pati përplasje mes protestuesve dhe policisë.
Nëntë efektivë u plagosën dhe pesë persona u arrestuan, sipas transmetuesit publik RTVE.
Në Madrid, Unioni i Qiramarrësve deklaroi se në protestë morën pjesë rreth 500 mijë persona, ndërsa autoritetet e vlerësuan shifrën në 70 mijë. Protestuesit brohorisnin “Ne kemi çelësat e gjithë qytetit” dhe kërkonin ndërhyrjen e qeverisë për frenimin e rritjes së qirave.
Protestat vijnë pasi qeveria e kryeministrit Pedro Sánchez dështoi në Kongres të premten të miratonte një paketë masash për krizën e strehimit.
Propozimet përfshinin pezullimin e dëbimeve të qiramarrësve vulnerabël deri në vitin 2030, zgjatjen e kontratave të qirasë, rritjen e taksave për apartamentet turistike dhe kufizime për blerjet nga fondet e investimeve.
Të dy dekretet u rrëzuan në parlament, duke shtuar presionin mbi qeverinë e pakicës së Sánchez dhe spekulimet për mundësinë e zgjedhjeve të parakohshme.
Kriza e strehimit është thelluar ndjeshëm në Spanjë. Banka e Spanjës vlerëson se vendit i mungojnë rreth 700 mijë banesa, ndërsa çmimet e pronave janë rritur me 12.2% gjatë vitit të fundit
Qiratë u rritën me 8.5% në vitin 2025, ndërsa në Madrid rritja ishte 9.7%. Barcelona dhe Madridi janë aktualisht qytetet më të shtrenjta për qira, me përkatësisht 23.80 dhe 22.70 euro për metër katror.
Discussion about this post