Nënkryetari i LSI, Petrit Vasili, ka bërë një deklaratë të fortë ditën e sotme. Me anë të një statusi në facebook, ai ka akuzuar qeverinë duke thënë se grabitja e Rilindjes nuk po kursen asgjë, as bukën e gojës, as buxhetin e shtetit dhe as pronat publike.
“Të gjithë në këmbë kundër grabitjes monstruoze rilindase të pronës dhe jetës së shqiptarëve! Nga rrugët e florinjta me mbi 20 milion euro km e deri tek rritja e çmimit të bukës tregojnë se grabitja dhe pervehtesimi rilindas nuk kursen asgjë. Kur nuk kurseu as çmimin e bukës mendoni të tjerat.
Mijëra familje po përballen me Covid-in dhe shpenzojnë e futen në borxhe për përballuar sëmundjen ndërsa rilindja, që e ka për detyrë jo vetëm nuk i ndihmon, por përkundrazi vazhdon koncesionet për oligarkët, që gllabërojnë miliona euro duke i lënë shqiptarët në ditë të hallit. Pronat publike po grabiten vazhdimisht dhe hipotekat janë kthyer në vatra grabitjeje të pronave të qytetarëve aq sa në Vlorë ku deputet kanë qenë për plot tetë vjet Edi Rama, janë ndryshuar një ushtri me drejtorë” – shkruan Vasili.
Ai thekson se tenderët grabisin dhjetëra miliona euro dhe që 7 prej tyre janë vetëm në Unazën e Tiranës nën sytë e Prokurorisë që nuk po reagon.
“Tenderët, që grabisin dhjetëra milion euro bëhen në mes të Tiranës ku 7 prej tyre në Unazën e Tiranës rrëmbejnë 130 milion euro dhe mënyra skandaloze se si ato bëhen, ku çmimi ka vlerë vetëm 50% të pikëve dhe diplomat e teknikëve ndajnë thelën e fitimit të tenderit, është provë kaq e qartë sa vetëm sytë e plasur të Prokurorisë Shqiptare nuk e shohin” – shkruan Vasili në facebook.
Sipas Vasilit, ky një mision shpëtimi kombëtar dhe gjithë shqiptarët duhet të ngrihen në këmbë, me denoncime, demaskime dhe protesta në çdo cep të Shqipërisë.
