Banorët e fshatit Greps në njësinë administrative Nikël të Fushëkrujës, janë ngritur sërish në protestë. Ata janë mbledhur pranë shkollës së fshatit, pasi ndihen të rrezikuar për banesat e tyre. Banorët kanë pohuar se një person ka falsifikuar dokumentacionet e banesave, me të cilin prej vitesh janë në proces të hapur gjyqësor. Personi në fjalë ka blerë në mënyrë të paligjshme pronat e tyre, të cilat kërkon t’i shembë për të vijuar projektet e tij. Ndër të tjera janë ngritur dhe një sërë akuzash ndaj institucioneve, të cilat janë bashkëpunëtore, duke dhënë vendime të padrejta, abuzime me dokumentacionin, pikërisht për të favorizuar palën kundërshtare.
Gjithashtu, po ky person, kërkon të rrafshojë varrezat e fshatit, madje ka ndryshuar dhe emrin e shkollës. Këto veprime të njëpasnjëshme të tij, i kanë revoltuar tej mase banorët.
Procesi gjyqësore është ende në Gjykatën e Lartë, ndërsa i bëhet apel SPAK-ut që të verifikojë dokumentacionin e këtij personi, si dhe të nisë një hetim për institucionet e Krujës, me në krye gjyqësorin.
Protestat pritet të vijojnë ende, kjo për shkak se deri më tani nuk është dhënë asnjë zgjidhje për këto familje, të cilat çdo ditë jetojnë me frikën se fadromët do të vijnë e të shembin banesat e tyre.
