Deputeti socialist Erion Brace duket se ka reaguar me vonesë për protestën e organizuar sot nga banorët e Lushnjës dhe Divjakës për heqjen e barrierave të vendosura tek “Pushimi i Shoferit”, pasi për to është kosto e shtuar që të nxjerrin prodhimet në treg.
Sipas Braçes, kjo është një lehtësi për shtetin, por jo për qytetarët sepse u shtohet kostoja e transportit dhe pas pandemisë së COVID çdo gjë rëndon më shumë në xhepat e tyre.
“Vetëm nga bllokimi i pushimit të shoferit, bujqve prodhues, grumbulluesve, përpunuesve, furnitorëve, por edhe qytetareve xhanëm, për punë e për nevoja të tyre ju shtohen: 5.4 km nëse kthehen në Saver, 3.8 km nëse arrijnë të hyjnë në nënkalimin e Shakuj (kamionet jo njëherë), 9.2 km një here, 18.4 dy herë në ditë. E para është koha që ikën në pandemi e bujqësi koha është jetike; e dyta është kostoja që shtohet-me çmime të rritura, kostoja shtesë rëndon”, ka shkruar ai.
Braçe propozon që të ndërtohet një nyje e re me nënkalime në çdo drejtim dhe rrugët dytësore janë zgjidhje për njerëzit. Deri atëherë thotë Braçe më tej hapja e nyjës nën masa të reja sigurie, horizontale e vertikale duhet të ndodhë.
“Tani; problemi është rruga, ndërtuar në 2007-tën nga një kokëbosh, gabim dhe e rrezikshme! Me mbikalime lënë në ajër dhe pa rrugë dytësore. Por pas 14 vitesh Kokëboshi nuk është shfajësim dhe bllokimi nuk është zgjidhje; Një nyje e re me nënkalime në çdo drejtim dhe rrugët dytësore janë zgjidhja për njerëzit. Deri atëherë hapja e nyjes nën masa të reja sigurie, horizontale e vertikale duhet të ndodhë”, ka shkruar ai.
Në shkrimin e tij deputeti socialist, shkruan se është i zhgënjyer me policinë, mënyrën e të menduarit ku urdhri tejkalon arsyen, duke e bërë të lehtë për vete e me kosto për qytetarin.
