Liza Marku, gruaja e moshuar, të cilës iu shemb banesa në “5 Maj” doli sot në protestë, ku kërkon lirimin e djalit të saj. Ajo thotë se i biri nuk ka bërë asnjë faj, vetëm ka mbrojtur pronën e tij. Më tutje ajo tha se djali është i sëmurë dhe i rrezikohet jeta në qeli.
“I bëj thirrje shtetit e gjykatës të na nxjerrë sa më shpejt nga burgu ata 5 persona. Gruaja, arma e shtëpia nuk i jepet asnjë njeriu, ai që i jep nuk është burrë, por njeri kot i thotë vetes njeri kot, Unë e kam djalin në burg, ai është i sëmur, me tension. Unë kam vajtuar në shtëpi, si mund të rrijë nëna pa birin?! Ti lirojnë të arrestuarit. As në Afganistan nuk e kanë bërë kështu”, deklaroi ajo.
Ajo tha se gruaja, arma dhe shtëpia nuk i dorëzohen askujt. Gruaja e moshuar iu drejtua rinisë dhe popullit shqiptar që të marrë në dorë fatin e vendit.
“I bëj thirrje gjithë rinisë e popullit të hapë sytë e të vijë të marrë fatet e këtij vendi se këtu veç me thonë burra shkoni kapni hujt se na ka vonë dreqi për fund, se janë dy tre vetë që sundojnë botën. Mos e gëzofshin mundin tonë e djersën tonë. Djali im s’i ka bërë me drogë e hajdutllëqe. Populli të mblidhet sa me shumë para Parlamentit, Kryeministrisë, ambasadës amerikane, gjykatat, gjykata të japë drejtësinë se mua më prishin shtëpinë e jetën”, tha Liza Marku.
Policia e Tiranës konfirmoi dje se ka prangosur 5 persona dhe ka proceduar 2 të tjerë pasi kanë plagosur dhe kundërshtuar forcat e policisë pas prishjes së disa banesave të tjera në “5 maj”.
Discussion about this post