Situata është tensionuar mëngjesin e sotëm në zonën naftëmbajtëse të Patos-Marinzës, ku ka nisur protesta që banorët kishin paralajmëruar prej dy ditësh ndaj kompanisë Bankers Petroleum.
Protestuesit kanë hapur me forcë portën e një prej sektorëve të kompanisë dhe më pas kanë hyrë në ambientet e saj.
Banorët u kanë kërkuar punonjësve të largohen nga zona, ndërsa përplasja lidhet me kontratat për tokat që banorët ia kanë dhënë me qira kompanisë.
Në qendër të protestës qëndron pikërisht pretendimi i pronarëve se Bankers Petroleum nuk po respekton detyrimet financiare që burojnë nga këto kontrata.
Një prej banorëve e ka artikuluar drejtpërdrejt konfliktin gjatë protestës.
“Është prona ime, jo e jotja. Kemi bërë një kontratë bashkë, por nuk po e zbaton, nuk po më jep lekët”, është shprehur ai.
“Do të bëjmë ca është e mundur se kemi dy vjet që po na tallin,. Vjet pas një viti na dhanë lekët. Ndërsa sivjet nuk po bëhet asnjë veprim. Thotë jam me humbje. Naftë ka, ai thotë jam me humbje. Nuk po firmosim dot kontratat.
Ai thotë që jam me humbje. Ti vetë erdhe në tokën time dhe tani thotë nuk më del hesapi. Unë me atë tokë ushqehem. Jam invalid”, u shpreh një tjeter banor.
Banorët e Marinzës, Belinës, Sheqishtës, Zharrëzës, Kallmit, Frashërit dhe Kumanit pretendojnë se prej fillimit të vitit 2026 nuk kanë marrë pagesat për tokat që kompania përdor për aktivitetin e saj, përfshirë rrugë, parkingje, sheshe pune dhe puse nafte. Sipas tyre, rreth 800 banorë preken nga kjo situatë.
Banorët kërkojnë që “Bankers Petroleum” të zbatojë kushtet e kontratave ekzistuese për qiratë e tokave, ku shprehen se kompania nuk ka përmbushur detyrimet për pagesat dhe po tenton të ndryshojë vlerën e marrëveshjeve pa pëlqimin e pronarëve.
Kujtojmë që gjatë protestës së dy ditëve më parë, një përfaqësi e banorëve zhvilloi një takim rreth 10 minuta me drejtues të kompanisë, por sipas tyre nuk u arrit asnjë zgjidhje. Përfaqësuesi i banorëve, Aleksandër Profka, deklaroi se drejtuesit e “Bankers Petroleum” e kanë argumentuar situatën me kostot e larta operative, një shpjegim që protestuesit nuk e pranojnë si arsye për moszbatimin e marrëveshjeve.
Banorët paralajmërojnë se, nëse kompania nuk respekton kontratat sipas kushteve të rëna dakord, do të kërkojnë rikthimin e tokave në gjendjen e mëparshme. Ata kanë paralajmëruar gjithashtu se, në mungesë të një përgjigjeje, protesta mund të përshkallëzohet deri në bllokimin e aktivitetit nxjerrës në disa prej shesheve kryesore të vendburimit të Patos-Marinzës.
Discussion about this post