Pedagogë dhe studentë janë mbledhur paraditen e sotme, para Universitetit të Tiranës, aty ku kanë vendosur të mbështesin studentët.
Stafet akademike kanë dalë në mbështetje të protestës së studentëve dhe në deklaratën e tyre ata shprehen se janë kundër dhunës që është ushtruar nga policia mbi studentët gjatë këtyre ditëve.
Pedagogët nga universitete të ndryshme të Tiranës do të nisin marshimin drejt bulevardit kryesor “Dëshmorët e Kombit”.
Kreu i Sindikatës së Pedagogëve, Sandër Kovaçi në fjalën e tij para të gjithë pedagogëve, i kërkoi kryeministrit Rama që të japë dorëheqjen dhe t’i japë zgjidhje politike situatës së krijuar.
Teksa tha se padogëgët janë në mbështetje të të rinjve, ai dënoi dhunën e ushtruar nga policia ndaj të rinjve që protestojnë.
Sipas tij, kjo qeveri nuk i dëgjon studentët dhe kur nuk dëgjon protestat paqësore do përballesh me të rinj të revoltuar.
“Kjo është një qeveri që nuk dëgjon. Meqë nuk dëgjoi studentët është logjike që do eskalonte kjo lëvizje. Kur nuk i përgjigjesh protestave paqësore, do presësh protestues të revoltuar.
Fatkeqësisht qeveria dhe kryeministri në vend që ti përgjigjej protestuesve paqësore sot ajo iu përgjigj me dhunë. Ajo që është më e keqja është se në kemi parë edhe persona civilë që rrezikojnë jetën e qytetarëve, ne si profesorat jemi të shqetësuar. Brutaliteti ndaj rinisë shqiptare është e papranueshme. I bëjmë thirrje përfaqësive ndërkombëtare, ambasadave që të hedhin sytë nga Shqipëria dhe nga ky brutalitet”, tha Kovaçi.
“Në mbështetje të tyre kemi vendosur që të bëjmë një marsh kundër dhunës së policisë. Sot duhet një zgjidhje dhe zgjidhja duhet të vijë nga politika”, tha Kovaçi, i cili kërkoi dorëheqjen e kryeministrit Rama.
Ai bëri thirrje që pedagogët të dalin çdo ditë në orën 10:00 para Universitetit Politeknik në mbështetje të të rinjve.
Discussion about this post