Policia ka arrestuar 30 persona, në disa nga qytetet kryesore të vendit pasi akuzohen se kanë bllokuar qarkullimin rrugor gjatë protestave të dy ditëve të fundit për shkak të rritjes së çmimit të naftës. Ndërsa sipas njoftimit, 95 të tjerë janë proceduar penalisht për shkak te pjesëmarrjes së tyre në protestë.
Mësohet se, në Lushnje janë proceduar 7 persona, pasi ditën e djeshme në vendin e quajtur “Rotondo e Plugut”, kanë bërë bllokimin e aksit rrugor Fier-Rrogozhinë, duke mos lejuar qarkullimin e mjeteve nga të dy senset e lëvizjes.
Në Durrës, u arrestuan dy persona, ndërsa u proceduan penalisht 50 shtetas të tjerë për veprat penale “Organizimi dhe pjesëmarrja në grumbullime e manifestime të paligjshme”, “Mosbindja ndaj urdhrit të punonjësit të policisë së rendit publik” dhe “Pengimi i qarkullimit të mjeteve të transportit”, kryer në bashkëpunim.
Në Shkodër, u proceduan 8 persona dhe u shpall në kërkim një tjetër. Në Mirëditë arrestohen në flagrancë 5 protestues, si dhe shpallen në kërkim 13 të tjerë pasi ditën e djeshme në fshatin Ndërfushaz, kanë bërë bllokimin e aksit rrugor Milot-Morinë duke mos lejuar qarkullimin e mjeteve nga të dy senset e lëvizjes.
Në Elbasan, penguan qarkullimin e automjeteve duke bllokuar rrugën nacionale Prrenjas-Pogradec dhe nuk iu bindën urdhrit të punonjësve të Policisë, duke u proceduar 7 protestues. Në Tiranë, arrestohen në flagrancë 23 persona, procedohen penalisht 23 të tjerë dhe po punohet për kapjen e një shtetasi tjetër.
Discussion about this post