Pedagogë dhe studentë të Universitetit të Korçës kanë bojkotuar mësimin, duke iu bashkuar protestës studentore që po zhvillohet në vend.
Fillimisht, pjesëmarrësit janë grumbulluar në ambientet e universitetit, nga ku më pas kanë nisur marshimin paqësor nëpër rrugët e qytetit, në shenjë solidariteti me studentët dhe kërkesat e tyre.
Përmes këtij veprimi, pedagogët dhe studentët korçarë kanë shprehur mbështetjen për protestuesit, duke e zgjeruar mobilizimin edhe jashtë kryeqytetit.
Marshimi në Korçë vjen në një kohë kur protestat studentore vijojnë në Tiranë, ndërsa kërkesat e të rinjve po marrin mbështetje edhe nga përfaqësues të universiteteve.
Të rinjtë në Korçë janë përballur me policinë para gjimnazit “Themistokli Gërmenji”, duke u bërë thirrje edhe gjimnazistëve të tjerë t’u bashkohen protestës.
“Hiqni kapelet, jeni të pacipë për 2.500 eurot e Ramës”, u drejtohen ata efektivëve, ndërsa i akuzojnë se po bëjnë terror.
“I mbani mirë fëmijët tuaj, po këta të tjerët ku do shkojnë?”, dëgjohet të thotë një prej të rinjve, duke kundërshtuar praninë e policisë.
Discussion about this post