Deputeti i Partisë Demokratike, Luan Baçi, u shpreh këtë të enjte se një prej policëve te Kuvendi e ka kërcënuar atë me armë.
Ai tha për mediat se polici ka nxjerrë armën duke e kërcënuar atë. “Ne ishim duke hyrë brenda dhe e gjithë policia me skafandra… nxori pistoletën dhe ma vendosi te gjoksi, duke më shtyrë tutje. Ata plehra që janë aty. E nxori pistoletën dhe pastaj nisi të gjuajë me atë. Aty ishin shumë, por me mua u përplasën”, tha Baçi.
Akuza ngriti edhe Gaz Bardhi, duke thënë se dy deputetët e PD-së Nallbatin dhe Baçin janë kërcënuar me armë nga një prej policëve.
“Nuk ka ndodhur kurrë të hyjnë në Kuvend forca të policisë që të dhunojnë deputetët, Kjo është fytyra e vërtetë të një ushtari të bandave të Durrësit në krye të ministrisë së Brendshme. Nuk na trembin”, u shpreh Bardhi.
Kërcënimin e pohoi edhe deputeti Nallbati.
Sekretari i Përgjithshëm i PD-së, Flamur Noka kërkoi ndjekje penale ndaj efektivëve. Ai u zotua se mosbindja civile do të vijojë çdo ditë.
Kërcënimi me armë, sipas demokratëve, ka ndodhur në episodin që paraqitet në videon e mëposhtme.
Policia: Efektivët nuk kanë pasur armë. Paralajmëron akuza penale
Policia e Shtetit mohoi se deputetëve të opozitës u janë nxjerrë armë gjatë protestës. Policia thotë se asnjë prej efektivëve nuk ka qenë i armatosur.
“Bazuar në ligjin “Për tubimet”, punonjësit e Policisë, të angazhuar për mbarëvajtjen e tubimit, asnjë punonjës policie nuk ka qene i pajisur me armë zjarri gjate tubimit, po vetëm me mjete mbrojtëse dhe me shkopinj gome. Përgënjeshtrojmë lajmin që punonjës të Policisë, në tubim, iu kanë nxjerrë tubuesve, armët e zjarrit”, tha policia në një njoftim për mediat.
Video e postuar nga Policia
Më tej në njoftim, paralajmërohen akuza penale ndaj protestuesve.
“Ndërkohë, Policia e Shtetit do të kryejë të gjitha veprimet hetimore dhe shtetasit përgjegjës për veprimet e dhunshme ndaj punonjësve të Policisë, do të kallëzohen në Prokurori”.
PD paralajmëron kallëzim në SPAK: video mashtrim
Më tej, Grupi Parlamentar i PD parajmëroi kallëzim penal në SPAK për “Kryetaren e Kuvendit, Ministrin e Brendshëm, Drejtorin e Përgjithshëm të Policisë, Drejtorin e Policisë së Tiranës, disa punonjës të paidentifikuar policie”.
Sipas PD, persona të armatosur u futën në Kuvend në kundërshtim me ligjin dhe kanosën me armë deputetët.
Lidhur me videon e Postuar nga Policia (më lartë), PD shprehet se “Policia e Shtetit ka shpërndarë një video ku tenton të mbulojë aktin e rëndë të gardistit i cili i drejtoi armën dy deputetëve të opozitës, Luan Baçi dhe Bledion Nallbati”.
“Në një video e cila i është shpërndarë medias nga vetë Policia, tregohet qartë se bombola e gazit është në pozicionin e brinjës ndërsa pistoleta poshtë saj. Kjo hedh poshtë mashtrimin e policisë për të fshehur një tentim vrasje të deputetëve të opozitës”, thuhet në një njoftim nga zyra e shtypit e PD.
Discussion about this post