Vijon edhe sot në kryeqytet protesta e 116-të kundër qeverisë dhe kryeministrit Edi Rama. Organizatorët kanë paralajmëruar vijimin e qëndresës së përditshme, ndërsa qytetarët pritet të mblidhen në Tiranë si çdo pasdite, për të vijuar më pas me marshimin në rrugët e kryeqytetit.
Skandalet që dalin në dritë çdo ditë e më shumë bëjnë që qytetarët të vazhdojnë të qëndrojnë në shesh, ndërsa janë shprehur se nuk do të largohen deri në largimin e Ramës dhe qeverisë së tij.
Rasti më i fundit ishte goditja e SPAK ndaj kreut të SHIH, Vlora Hyseni, e cila dyshohet e përfshirë në dosjen AKSHI dhe se ka ndihmuar Ergys Agasin.
Ky skandal u trajtua edhe në protestën e një dite më parë, ndërsa qytetarët u shprehën se shteti ka rënë dhe se kryeministri duhet të dorëhiqet.
Protesta pritet të zhvillohet edhe sot me fjalime të aktivistëve dhe qytetarëve, përpara nisjes së marshimit.
Gjatë tubimeve të fundit janë përsëritur thirrje si “Rama jep dorëheqjen”, “Ju erdhi fundi” dhe “Arrestoni Ramën”, “Shteti ka rënë”, “arrestoni Ballukun”, ndërsa protestuesit kanë mbajtur pankarta me mesazhe kundër korrupsionit dhe për ndryshimin e mënyrës së përfaqësimit politik.
Një tjetër thirrje e përsëritur gjatë marshimeve ka qenë “Bashkohuni studentë, kombi na thërret”, me organizatorët që kërkojnë pjesëmarrje sa më të gjerë qytetare.
Në fjalimet e ditëve të fundit janë trajtuar edhe çështje të tjera politike, përfshirë ndryshimet kushtetuese të vitit 2008, mënyrën e përfaqësimit në Kuvend, Reformën Territoriale, zonat e mbrojtura, Paketën e Maleve dhe investimet strategjike.
Organizatorët kanë bërë thirrje për vijimin e protestave dhe marshimeve në kryeqytet. Sipas tyre, qëndresa do të vijojë edhe në ditët në vazhdim, ndërsa kërkesa për dorëheqjen e kryeministrit mbetet në qendër të tubimeve.
Discussion about this post