Prej disa ditësh shqiptarët kanë mbushur sheshet, duke protestuar kundër Kryeministrit Edi Rama.
Ashtu si për çdo ditë, edhe sot protesta do të nisë në orën 18:00, për të pritur më shumë qytetarë, ndërsa dje iu bë thirrje Diasporës që të marrë pjesë në tubim.
Shqiptarët do të dalin sërish në protestë, e cila nisi kundër projekteve për ndërtimet në zonën e Zvërnecit.
Nën sloganin “Shqipëria e Re”, mijëra qytetarë u bashkuan mbrëmë para kryeministrisë me kërkesën për dorëheqjen e Ramës.
“O Erion, o llir prite Ramën mysafir” dhe “O Erion, o legen prite Ramën se po vjen”, “Poshtë komunizmi”, “Ju erdhi fundi”, “Atdheu nuk Shitet”, “Bashkohuni me Ne”, “Poshtë patronazhistët”, “Opozita jemi ne”, “Jemi antipartiakë”, këto kanë qenë disa nga thirrjet që kanë shoqëruar marshimin e tyre.
Pjesëmarrësit e shumtë shprehën pakënaqësinë e tyre ndaj qeverisjes aktuale dhe kërkuan mbajtjen parasysh të kërkesave të qytetareve. Ndërkohë, aktivisti i Lëvizjes qytetare Edmond Gjata njoftoi se kanë dorëzuar në KQZ një draft për ndryshime të kodit zgjedhor. Ai tha se në zgjedhjet e ardhshme do të ketë një kod që i jep mundësitë dhe përparësitë qytetarëve.
“Kemi dorëzuar në KQZ një draft për ndryshime të kodit zgjedhor. Shqipëria e re fillon nga zgjedhje të lira dhe të ndershme. Këto zgjedhje në 35 vite janë bërë për partitë, jo për qytetarët. Kodi i ri, është kodi i qytetarëve, që shprehin interesat e tyre dhe jo të Edi Ramës,” tha ai.
Protestat janë zhvilluar kudo ku ka shqiptarë. Me flamuj dhe pankarta në duar, shqiptarët kanë dalë në protestë, duke kërkuar largimin e Ramës edhe në Itali, Angli, SHBA, Bruksel, Gjermani, Holandë, Austri dhe Norvegji.
Discussion about this post